2024 جىلدىڭ باسىنان بەرى ەلىمىزدە 320 ورمان ءورتى تىركەلدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
بۇل تۋرالى ورمان شارۋاشىلىعى جانە جانۋارلار دۇنيەسى كوميتەتىنىڭ باس ساراپشىسى رينات نۇرعازين حابارلاعان.
ماماننىڭ ايتۋىنشا، ورمان ورتتەرىنىڭ باسىم بولىگى — نايزاعايدىڭ سالدارىنان، ال ءبىراز بولىگى — ادام ارەكەتىنەن شىققان.
ء«ورت قاۋپى بەس دەڭگەيگە بولىنەدى. ەڭ جوعارعىسى – بەسىنشى سىنىپ. بۇل، نەگىزىنەن، جاز مەزگىلىندە، اپتاپ ىستىقتا تىركەلەدى. بيىلعى 320 ءورتتىڭ 217-ءسى نايزاعايدىڭ اسەرىنەن شىققان. نايزاعاي قۇرعاق شوپكە تۇسكەن كەزدە بىرنەشە مينۋتتا ءورت تۇتانىپ، ۇلكەن ورمان ورتىنە ۇلاسۋى مۇمكىن»، – دەدى ساراپشى.
سونىمەن قاتار، ادام فاكتورىنان شىققان 12 ورمان ءورتى دە انىقتالعان. كوبىنەسە بۇل — تەمەكى تۇقىلىن، شىنى بوتەلكە نەمەسە جانعىش زاتتاردى تاستاپ كەتۋدىڭ سالدارى.
«قازىرگى تاڭدا وسىنداي قۇقىقبۇزۋشىلىقتارعا 52 ملن تەڭگە كولەمىندە ايىپپۇل سالىندى. ونىڭ 12 ميلليونى ءوندىرىلىپ الىندى، ال كەيبىر ىستەر سوتقا جولداندى»، – دەدى رينات نۇرعازين.
كوميتەت وكىلى ءاربىر ورمان ءورتى بويىنشا قىزمەتتىك تەكسەرىس جۇرگىزىلەتىنىن اتاپ ءوتتى. سەبەپتەر ارنايى كوميسسيا ارقىلى انىقتالىپ، قاجەت جاعدايدا قىلمىستىق ءىس قوزعالادى.
سونىمەن قاتار، ەكولوگيا مينيسترلىگى مەن جەرگىلىكتى اكىمدىكتەر ورمان شارۋاشىلىقتارىن قورعاۋعا ارنالعان 2024–2027 جىلدارعا ارنالعان كەشەندى جوسپاردى قابىلداعان. بۇل جوسپار اياسىندا 68 ميلليارد تەڭگە ءبولىنىپ، تەحنيكالىق جابدىقتارمەن قامتۋ كوزدەلىپ وتىر.
الايدا ساراپشىنىڭ ايتۋىنشا، ورماندى ساقتاۋ تەك مەملەكەتتىك قۇرىلىمداردىڭ ەمەس، ءار ازاماتتىڭ دا ورتاق جاۋاپكەرشىلىگىنە بايلانىستى.
ء«ار ادام ورماندا ءوزىن دۇرىس ۇستاۋدى، بالالارىن سوعان ۇيرەتۋدى، وت جاققان سوڭ مىندەتتى تۇردە ءسوندىرۋدى، جانعىش زات قالدىرماۋدى ءبىلۋى كەرەك»، – دەپ اتاپ ءوتتى نۇرعازين.
قازىر ورماندى جەرلەرگە كەلەتىن تۋريستەردىڭ سانى ارتىپ كەلەدى. بۇل جاعداي ءورت قاۋىپسىزدىگىنە بايلانىستى ماسەلەلەردى كۇردەلەندىرىپ وتىر. وسىعان بايلانىستى ورمان قىزمەتكەرلەرى ءتۇسىندىرۋ جۇمىستارىن جۇرگىزىپ، پروفيلاكتيكالىق دارىستەر وقىپ، حابارلامالار تاراتۋدا.
