قر ءماجىلىسىنىڭ دەپۋتاتى، اقىن قازىبەك يسا جىل سايىن مۇز بولشەكتەرىنەن قاشاپ سالىناتىن جاساندى قالاشىقتارعا بولىنەتىن قارجىنى توقتاتۋدى تالاپ ەتتى. اۆتور اتالمىش قاجەتسىز جوبالار ءۇشىن مەملەكەت قارجىسىن بوسقا شىعىنداماي، قايتا بارلىق كۇشتى ەكىباستۇز قالاسىنىڭ الەۋەتىن كوتەرۋگە جۇمساۋ قاجەت ەكەندىگىن ايتتى. بۇل جايلى "ادىرنا" ۇلتتىق پورتالى حابارلادى.
“جاڭا جىل” دەپ مۇزقالا سالعىش اكىمدەر، ونىڭ ورنىنا ونسىز دا مۇزقالاعا اينالعان ەكىباستۇزعا كومەك بەرۋى كەرەك! بۇل ءسوز، ەڭ الدىمەن، تاۋەلسىزدىك كۇنىن اتتاپ ءوتىپ، جاڭا جىل مەرەكەسىنە ءبىر اي بۇرىن كىرىسكەن، بيىلدىڭ وزىندە بيۋدجەتتەن مۇز قالاشىق سالىپ، شىرشا ورناتۋعا 44,1 ميلليون تەڭگە بولگەن قوستاناي قالاسى اكىمى مارات جۇندىباەۆقا جانە باسقا قالالار اكىمدەرىنە ارنالادى. بۇل تۋرالى قازاقپارات اگەنتتىگىنىڭ ساۋالىنا جاۋاپ بەرگەن قالا اكىمىنىڭ ءباسپاسوز حاتشىسى ءماجيت شۇلەنوۆ تە ءمالىم ەتكەن.
قوستاناي قالاسى اكىمى مارات جۇندىباەۆتىڭ “استانا” تەلەارناسىنا ايتۋىنشا، جاڭا جىلعا بولىنگەن بۇل بيۋدجەت اقشاسى كوپ ەمەس ەكەن، ءالى جەتكىلىكسىز كورىنەدى…بۇدان بولەك قوستانايداعى 2 شاعىن اۋداندا جاڭا جىلدىق شىرشا مەن سىرعاناقتار بوي كوتەرەدى ەكەن. قوستاناي قالاسى اكىمدىگىنىڭ ايتۋىنشا، 2019 جىلى دا جاڭاجىلدىق بەزەندىرۋگە 44 ملن تەڭگە جۇمسالعان، - دەدى دەپۋتات.
كەيىننەن دەپۋتات ەكىباستۇزداعى دوكەي-وليگارح كلەبانوۆتىڭ ەسىرگەن قىلىعىن سىناپ تاستادى.
- ال كەزىندە جىلۋ ەنەرگيا ورتالىقتارىن تيىنعا الىپ، دوللارمەن ميلليونەرلەر اتالىپ وتىرعان وليگارح كلەبانوۆتار مەن ءتىلى دۇرىس بولماعاسىن تىرلىگى دۇرىس بولمايتىن وبلىس، قالا باسشىلارىنىڭ كەسىرىنەن قاقاعان ايازدا جىلۋسىز قالعان ەكىباستۇز قالاسى تۇرعىندارى پانا ىزدەپ، مۇزقالاشىققا اينالعان ءوز ۇيلەرىنەن باس ساۋعالاپ بەزىپ كەتتى…
جىلىنۋ ءۇشىن ىستىق سۋ قۇيعان بوتەلكەلەردى قۇشاقتاپ ۇيىقتاۋعا دەيىن بارۋ نە دەگەن ماسقاراشىلىق!ال وسىنىڭ بارىنە، تىكەلەي كىنالى، تۇرعىنۇي-كوممۋنالدىق سالاعا جاۋاپ ەرەتىن پاۆلودار وبلىسى اكىمىنىڭ ءبىرىنشى ورىنباسارى ولەگ كرۋكتىڭ وبلىس اكىمى مىندەتىن اتقارۋشى بولعانى ايازدا جىلۋ ىزدەگەن جۇرتتى ودان سايىن قالتىراتىپ جىبەردى… ازىرشە، “مىندەتىن اتقارۋشى” دەگەن ۋاقىتشا انىقتاۋىشتان جۇبانىش تاۋىپ، بولاشاقتا حالىقپەن حالىقتىڭ تىلىندە سويلەسە الاتىن ىسكەر اكىمنەن ءۇمىتتى بولىپ وتىر…
ءبىر توپ پارلامەنت دەپۋتاتتارى ەكىباستۇز قالاسىنا بارىپ، اپاتتى جاعدايدى وڭالتۋ ءۇشىن ۇلەستەرىن قوسىپ قايتتى. قىمباتشىلىقتان قىسىلىپ، ايلىعى شايلىعىنا جەتپەي، نانىن زورعا تاۋىپ وتىرعان حالىقتىڭ قىرۋار قارجىسىن كۇن جىلىعاندا ەرىپ كەتەر جاساندى “قۇرىلىسپەن” سۋعا اعىزىپ جىبەرگەنشە، جۇرتقا پايدالى ىسكە جۇمساۋ كەرەك، اكىم مىرزالار! - دەپ ويىن تۇيىندەدى ءتىل جاناشىرى.
"ادىرنا" ۇلتتىق پورتالى
