PepsiCo-نىڭ الماتى وبلىسىندا جاڭا زاۋىت قۇرىلىسىنا ينۆەستيتسيا سالۋدى جوسپارلاپ وتىر. بۇل تۋرالى پرەمەر-مينيستر ولجاس بەكتەنوۆ پەن PepsiCo-نىڭ ورتالىق ازيا، رەسەي، بەلارۋس جانە كاۆكاز ايماعىنداعى پرەزيدەنتى دەۆيد ءمانزينيدىڭ كەزدەسۋىندە بەلگىلى بولدى، دەپ حابارلايدى “ادىرنا” ۇلتتىق پورتالى.
قر ۇكىمەتىنىڭ ءباسپاسوز قىزمەتىنىڭ حابارلاۋىنشا، «Lays كارتوپ چيپسى» سياقتى تانىمال ونىمدەردى شىعارۋدى قامتيتىن جوبا وبلىستاعى ەڭ ءىرى جوباعا اينالادى جانە 350 بىلىكتى جۇمىس ورنىن قۇرۋدى كوزدەيدى.
2026 جىلى اشىلۋى جوسپارلانعان زاۋىت قورشاعان ورتاعا تيگىزەتىن اسەرىن بارىنشا ازايتۋ ءۇشىن وزىق تەحنولوگيانى، سونىڭ ىشىندە قالدىقتاردى 100 پايىز قايتا وڭدەۋدى قولدانادى. كاسىپورىن 2026 جىلدان باستاپ جەرگىلىكتى شيكىزاتتى، ونىڭ ىشىندە جىل سايىن 66 مىڭ تونناعا دەيىن كارتوپ ساتىپ الۋدى كوزدەپ وتىر. ونىڭ قۋاتتىلىعى جىلىنا 16 مىڭ توننا دايىن ءونىمدى قۇرايدى، كەيىننەن 2027 جىلدان باستاپ 21 مىڭ تونناعا دەيىن وسەدى.
دايىن ءونىم ورتالىق ازيا مەن ودان تىسقارى ەلدەردىڭ نارىقتارىنا جەتكىزىلەتىن بولادى. قۇرىلىس كەزەڭىندە مىڭعا دەيىن ادام تارتىلادى، جوبانىڭ ءوزى بىلىكتى جۇمىس ورنىن قۇرۋدى جوسپارلاۋدا.
زاۋىت قۇرىلىسى ۇكىمەتتىڭ ەرەكشە باقىلاۋىنداعى باسىم ينۆەستيتسيالىق جوبالار تىزىمىنە ەنگىزىلگەن.
جوبا قازاقستاننىڭ PepsiCo سياقتى ماڭىزدى ينۆەستيتسيالىق سەرىكتەستەرمەن ۇزاق مەرزىمدى ىنتىماقتاستىعىنىڭ ماڭىزدىلىعىن كورسەتەدى جانە ەلدىڭ ەكونوميكانى ءارتاراپتاندىرۋ جانە تاماق ونەركاسىبىن دامىتۋ جونىندەگى ستراتەگيالىق ماقساتتارىنا بەيىمدەلەدى.
