الماتىدا ورنالاسقان Astana Motors Manufacturing Kazakhstan (AMMKZ) مۋلتيبرەندتى زاۋىتى 2025 جىلدىڭ ەكىنشى توقسانىندا ىسكە قوسىلادى، دەپ حابارلايدى “ادىرنا” ۇلتتىق پورتالى كۋرسيۆكە سىلتەپ.
وسى كەزەڭدە العاشقى جەڭىل كولىكتەر دە كونۆەيەردەن شىعارىلادى. بۇل جونىندە كومپانيا «استانا موتورس» وكىلدەرى حابارلادى.
جاڭا اۆتوكولىك ءوندىرىس ورنىنىڭ قۇرىلىسى اياقتالۋعا جاقىن. كومپانيا مالىمەتىنشە، زاۋىتتا مەتالل قۇرىلىمدارىن قۇراستىرۋ، سەندۆيچ-پانەلدەر ورناتۋ جانە شاتىر جابۋ جۇمىستارى تولىق اياقتالعان. قازىرگى باستى مىندەت — وندىرىستىك جانە اكىمشىلىك عيماراتتاردىڭ ىشكى ارلەۋىن اياقتاۋ.
سونىمەن قاتار، وتاندىق ماماندار مەن شەتەلدىك سەرىكتەس ينجەنەرلەر زاۋىتقا قاجەتتى تەحنولوگيالىق جابدىقتاردى ورناتىپ، ىسكە قوسۋ جۇمىستارىن جۇرگىزۋدە. كولىك شىعاراتىن العاشقى سىناق كەزەڭىنە دايىندىق تا باستالعان.
جوسپار بويىنشا، زاۋىت جۇمىسى ءتورت مودەلمەن باستالادى. ناقتىراق، Chery Tiggo 2 Pro, Haval Jolion, كەيىنىرەك Changan CS55 Plus پەن TANK 300 ۇلگىلەرى قوسىلادى. بۇل برەندتەر قازاقستاندىق جانە كورشىلەس نارىقتارداعى تۇراقتى سۇرانىسقا بايلانىستى تاڭدالعان.
AMMKZ زاۋىتى قازاقستاندا اۆتوكولىك ءوندىرىسىن جاڭا دەڭگەيگە شىعارىپ، ىشكى نارىقتى يمپورتتان ازات ەتۋدى، سونىمەن بىرگە جاڭا جۇمىس ورىندارىن اشۋدى جانە ەكونوميكانى ءارتاراپتاندىرۋدى كوزدەيدى. زاۋىت تولىق قۋاتىنا شىققان سوڭ، اۆتوكومپونەنتتەردى جەرگىلىكتەندىرۋ مەن ىشكى ءوندىرىستى دامىتۋدىڭ نەگىزگى درايۆەرىنە اينالادى دەپ كۇتىلۋدە.
