ماڭعىستاۋ وبلىسىنىڭ الەۋمەتتىك-ەكونوميكالىق دامۋى جونىندەگى كەڭەسكە قاتىسقان مەملەكەت باسشىسى قاسىم-جومارت توقاەۆ جاڭاوزەندەگى گاز وڭدەۋ زاۋىتى قۇرىلىسىنىڭ كەشىگىپ جاتقانىن سىنعا الىپ، مۇنى ۇكىمەتتىڭ ورەسكەل ولقىلىعى دەپ اتادى. بۇل تۋرالى اقوردا جازدى، دەپ حابارلايدى “ادىرنا” ۇلتتىق پورتالى.
«مەن بۇعان دەيىن جاڭاوزەندەگى گاز وڭدەۋ زاۋىتىن 2024 جىلعا قاراي ىسكە قوسۋ تۋرالى تاپسىرما بەردىم. بىراق ءتۇرلى راسىمدەر سوزىلىپ، مەردىگەرمەن كەلىسىم-شارتقا بىلتىر عانا قول قويىلدى. سونىڭ سالدارىنان زاۋىتتى ىسكە قوسۋ مەرزىمى 2027 جىلعا قالىپ قويدى. بۇل – ۇكىمەتتىڭ ورەسكەل ولقىلىعى«،– دەدى مەملەكەت باسشىسى.
توقاەۆ ۇكىمەتكە بۇل ماسەلەنى قاتاڭ باقىلاۋعا الۋىن ايتىپ، ەسكەرتۋ جاسادى.
بۇعان دەيىن «قاشاعانداعى» گاز وڭدەۋ زاۋىتىن ىسكە قوسۋ مەرزىمى تاعى دا كەيىنگە شەگەرىلگەن بولاتىن. «قاشاعان» كەن ورنىندا سالىنىپ جاتقان گاز وڭدەۋ زاۋىتىنىڭ قۇرىلىسى ەندى 2026 جىلدىڭ سوڭىنا دەيىن اياقتالىپ، پايدالانۋعا بەرىلەدى دەپ كۇتىلۋدە. ەنەرگەتيكا مينيسترلىگىنىڭ تۇسىندىرۋىنشە، جۇمىستار جوسپارعا ساي ءجۇرىپ جاتىر، الايدا بىرقاتار تەحنولوگيالىق نىساندار بويىنشا بەلگىلى ءبىر قيىندىقتار تۋىنداعان.