اقتاۋدا زاۋىتتىڭ جۇمىسشىلارى قىزمەتتەرىنەن ايىرىلعانى ءۇشىن نارازىلىق ءبىلدىرىپ، ەرەۋىلگە شىقتى، دەپ حابارلايدى "ادىرنا" ۇلتتىق پورتالى.
ينفورمبيۋرو مالىمەتىنشە، مۇناي قۇبىرلارىن شىعاراتىن كاسىپورىن باسشىلىعى ەكى تسەحتى جاڭاوزەن قالاسىنا كوشىرمەك بولعان. اقتاۋداعى تسەحتە ەڭبەك ەتكەن 250 ادامعا باسقا جۇمىس ىزدەي بەرىڭدەر دەپ ەسكەرتىپتى. ال قىزمەتكەرلەر باسشىلىقتىڭ الدىن الا ەسكەرتۋسىز، شۇعىل شەشىم شىعارعانىنا نارازى.
“بۇل جەردە 7 جىل، 10 جىلدان بەرى جۇمىس ىستەپ جاتقان ادامدار بار. شتاتقا اۋىسپاعان، گپح-مەن جۇمىس ىستەپ كەلە جاتىر. ەندى مەكەمەنى بۇلار جاڭاوزەنگە كوشىرىپ جاتىر. وسى ۋاقىتقا دەيىن ءبىزدى “الىپ كەتەمىز” دەپ الداپ كەلدى. ەندى “ەشقايسىسىڭ كەتپەيسىڭدەر، دەمالا بەرىڭدەر” دەپ وتىر. ءبىر اي بۇرىن ايتىلدى”، – دەدى جۇمىسشى سەرگەي جۇماحانوۆ.
نارازىلىققا شىققانداردىڭ باسىم بولىگى ءۇيىنىڭ جالعىز اسىراۋشىسى ەكەنىن ايتىپ، شاعىمدانۋدا.
“قاڭتاردان باستاپ جۇمىس ىستەپ جاتىرمىز. بىراق بىزگە كەلىسىمشارت بەرگەن جوق. كەلىسىمشارت جەلتوقساندا بىتتى. ونى سۇراعان كەزدە “بەرمەيمىز، جۇمىس توقتاپ جاتىر” دەدى. وسىنداي جاعداي بولىپ تۇر عوي. ءبىر كۇندە 200-دەن اسا ادامدى جۇمىستان شىعاردى”، – دەدى جۇمىسشى جەڭىسبەك تاعانوۆ.
ەرەۋىلدەن سوڭ زاۋىتتىڭ ءباسپاسوز قىزمەتى ماسەلە شەشىلگەنىن مالىمدەدى.
“2025 جىلدىڭ 6 اقپان كۇنى "كاسكورماشزاۆود" جشس اۋماعىندا كومپانيا قىزمەتكەرلەرى جينالىپ، بەينەۇندەۋ جاريالادى. 7 اقپاندا تاراپتار ءوزارا مامىلەگە كەلىپ، جۇمىسشىلاردىڭ نارازىلىعىن تۋدىرعان بارلىق ماسەلە شەشىلدى. قازىر قىزمەتكەرلەر جۇمىسقا قايتا كىرىستى”، – دەدى "كاسكور-ماشزاۆود” جشس ءباسپاسوز قىزمەتى.
