Almatyda ornalasqan Astana Motors Manufacturing Kazakhstan (AMMKZ) mýltıbrendti zaýyty 2025 jyldyń ekinshi toqsanynda iske qosylady, dep habarlaıdy “Adyrna” ulttyq portaly Kýrsıvke siltep.
Osy kezeńde alǵashqy jeńil kólikter de konveıerden shyǵarylady. Bul jóninde kompanııa «Astana Motors» ókilderi habarlady.
Jańa avtokólik óndiris ornynyń qurylysy aıaqtalýǵa jaqyn. Kompanııa málimetinshe, zaýytta metall qurylymdaryn qurastyrý, sendvıch-panelder ornatý jáne shatyr jabý jumystary tolyq aıaqtalǵan. Qazirgi basty mindet — óndiristik jáne ákimshilik ǵımarattardyń ishki árleýin aıaqtaý.
Sonymen qatar, otandyq mamandar men sheteldik seriktes ınjenerler zaýytqa qajetti tehnologııalyq jabdyqtardy ornatyp, iske qosý jumystaryn júrgizýde. Kólik shyǵaratyn alǵashqy synaq kezeńine daıyndyq ta bastalǵan.
Jospar boıynsha, zaýyt jumysy tórt modelmen bastalady. Naqtyraq, Chery Tiggo 2 Pro, Haval Jolion, keıinirek Changan CS55 Plus pen TANK 300 úlgileri qosylady. Bul brendter qazaqstandyq jáne kórshiles naryqtardaǵy turaqty suranysqa baılanysty tańdalǵan.
AMMKZ zaýyty Qazaqstanda avtokólik óndirisin jańa deńgeıge shyǵaryp, ishki naryqty ımporttan azat etýdi, sonymen birge jańa jumys oryndaryn ashýdy jáne ekonomıkany ártaraptandyrýdy kózdeıdi. Zaýyt tolyq qýatyna shyqqan soń, avtokomponentterdi jergiliktendirý men ishki óndiristi damytýdyń negizgi draıverine aınalady dep kútilýde.
