"اقبوكەن جانە ءىرى قارا ەتىن وڭدەۋ ءۇشىن". قىتايلىقتار بقو-دان 100 مىڭ گەكتار جەر سۇراپ وتىر

3574
Adyrna.kz Telegram
EcoJer
EcoJer

قىتايلىق ينۆەستورلار باتىس قازاقستان وبلىسىنان 100 مىڭ گەكتار جەر سۇراپ وتىر. ولار تەلىمدى جالعا الۋ ارقىلى ايماقتا اقبوكەن ەتىن وڭدەيتىن زاۋىت اشپاقشى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگ بارىسىندا وبلىس اكىمى ناريمان تورەعاليەۆ ايتتى، دەپ حابارلايدى «ادىرنا» ءتىلشىسى.

ايماق باسشىسى قىتايلىقتاردىڭ اكىمدىككە شامامەن ەكى اي بۇرىن جۇگىنگەنىن مالىمدەدى.

«شەتەلدىكتەر قازاقستاندىق ارىپتەستەرىمەن بىرگە زاۋىت سالۋعا نيەت ءبىلدىردى. بۇل كاسىپورىن اقبوكەن مەن ءىرى قارا مال ەتىن تولىق وڭدەۋدى جوسپارلاپ وتىر. ءبىز ولاردىڭ ۇسىنىسىن تىڭداپ، ءوز شارتتارىمىزدى ورتاعا سالدىق. كومپانيا ايماقتا تىركەلۋى كەرەك، سايكەسىنشە بارلىق سالىق شەگەرىمدەرى ايماق بيۋدجەتىن تولىقتىرادى. زاۋىت جەرگىلىكتى تۇرعىنداردى جۇمىسپەن قامتۋى كەرەك. ينۆەستورلار ءوز مىندەتتەمەلەرىن ورىنداۋى ءتيىس. ايتپەسە، جەر تاركىلەنەدى. شارتقا كەلىسىپ، قارجى تاپسا، جەردى بەرەمىز. قورقاتىن ەشتەڭە جوق، ولار جەرگە يەلىك ەتە المايدى، قايتا ساتا المايدى. ءبىز ءۇشىن وڭىرگە ينۆەستيتسيا تارتۋ – باستى مىندەت»، – دەدى ناريمان تورەعاليەۆ.

اكىم بۇل ماسەلەنىڭ كەلىسسوزدەر ساتىسىندا ەكەنىن اتاپ ءوتتى.

ايتا كەتەيىك، بۇعان دەيىن قىتايلىق ينۆەستورلارعا ۇلىتاۋ وبلىسىنان 20 مىڭ گەكتار جەر تەلىمى بولىنگەنى ايتىلعان ەدى. قازان ايىندا Sinohydro, تەحنوگرۋپپسەرۆيس كومپانيالارى جانە ۇلىتاۋ وبلىسىنىڭ اكىمدىگى اراسىندا ءۇش جاقتى مەموراندۋمعا قول قويىلدى. ءراسىم بارىسىندا جوسپارلانعان جوبالاردىڭ 2060 جىلعا دەيىن قازاقستاندا كومىرقىشقىل گازىنىڭ شىعارىندىلارىن ازايتۋعا جانە كومىرتەگى بەيتاراپتىعىنا قول جەتكىزۋگە باعىتتالعانى ايتىلدى.

پىكىرلەر