الماتى وبلىسى، كەگەن اۋدانىنا قاراستى ساتى اۋىلىندا زيراتتاردى قيراتقان كۇدىكتى ءوز ارەكەتىنە قاتىستى پىكىر ءبىلدىردى، دەپ حابارلايدى”ادىرنا” ۇلتتىق پورتالى.
الەۋمەتتىك جەلىلەردە تاراعان ۆيدەودا ول 2003 جىلى دۇنيەگە كەلگەنىن ايتىپ، ىستەگەن ءىسىن ءدىني نانىم-سەنىممەن بايلانىستىرادى.
ول دىندەگى ەڭ اۋىر كۇنانىڭ ءبىرى – اللاعا سەرىك قوسۋ ەكەنىن ايتىپ، پايعامبارلار ىسىنەن مىسال كەلتىرۋگە تىرىسقان. كۇدىكتى ءوز ارەكەتىن دە پايعامبارلارعا ەلىكتەۋمەن تۇسىندىرەدى.
جاعدايعا قاتىستى جۋرناليست دياس نۇراقىن Facebook پاراقشاسىندا پىكىر ءبىلدىردى.
“وتكەندە ساتى اۋىلىنداعى قۇلىپتاستاردى قيراتقان وسى جىگىت ەكەن. ءسوز ساپتاۋىنان-اق سوقىر سەنىمگە، تەرىس ۋاعىزعا تويىپ العانى بايقالادى. قابىردى قورلادىم، ولىلەردىڭ ارۋاعىن مازالادىم دەپ قايمىعىپ تۇرعان جوق. كەرىسىنشە ءوز ءىسىنىڭ دۇرىستىعىنا ماساتتانىپ وتىر. مۇلدە وقىماعان ادامعا قاراعاندا ءبىر عانا كىتاپ وقىعان ادام قاۋىپتى دەپ قالاي تاۋىپ ايتقان ءيا دانا قازاق؟!” - دەپ جازدى ول.
ەسكە سالا كەتسەك، بۇعان دەيىن ساتى اۋىلىندا بىرقاتار زيراتتاردىڭ بۇزىلعانى، قۇلپىتاستاردىڭ قيراعانى تۋرالى حابار تاراعان بولاتىن. كۇدىكتىنىڭ بۇعان دەيىن الدەبىر وعاش قىلىقتارىمەن تانىلعانى نەمەسە الدەبىر ەسەپتە تۇراتىنى تۋرالى حابارلانبادى.
