25 تامىز كۇنى وبلىستىڭ بىرنەشە اۋدانىندا ءبىر مەزگىلدە ەكولوگيالىق اكتسيالار باستالىپ، مىڭداعان بەلسەندىلەردى، قوعام وكىلدەرىن، جاستاردى، مادەنيەت سالاسى قىزمەتكەرلەرىن بىرىكتىردى.
اباي اۋدانىندا بۇل باستاماعا مەكەمە قىزمەتكەرلەرى، اۋىل تۇرعىندارى مەن جاستار قوسىلدى. قاراۋىل اۋىلىندا قاراۋىل توبە مەن وعان ىرگەلەس اۋماقتار تازارتىلىپ، اۋىلدىق وكرۋگتەردىڭ كوشەلەرى مەن اۋماقتارى جيناستىرىلدى. اكتسياعا شامامەن 400 ادام قاتىستى، 13 ارنايى تەحنيكا جۇمىلدىرىلىپ، 75 تونناعا جۋىق قوقىس شىعارىلدى.
– ءبىز، جاستار، بۇل اكتسيانى تولىق قولدايمىز. مۇنداي شارالار قورشاعان ورتاعا دەگەن جاۋاپكەرشىلىكتى ارتتىرىپ، تۋعان جەرگە دەگەن سۇيىسپەنشىلىكتى تەرەڭدەتە تۇسەدى. بىرلىگىمىز بەن بەلسەندىلىگىمىز ارقىلى تابيعاتتى قورعاۋعا جانە كوركەيتۋگە بار كۇشىمىزدى سالۋعا دايىنبىز، – دەدى بەلسەندى ەرزات قايراتۇلى.
اياگوز اۋدانىندا «ساياباقتار شەرۋى» ەكولوگيالىق اكتسياسىنا 50-دەن استام جاس قاتىستى. ولار «قۇتتىباي بي»، «اباي»، «التىن ادام»، «قوزى كورپەش – بايان سۇلۋ»، «ارداگەرلەر» ساياباقتارىن تازالاپ، 150-دەن استام قاپ قوقىس جيناپ، جالپى 3,9 گەكتار اۋماقتى قامتىدى.
– تازالىق پەن ءتارتىپ – كەز كەلگەن ءوڭىردىڭ تابىستى دامۋىنىڭ كەپىلى. مەملەكەت باسشىسى قاسىم-جومارت توقاەۆتىڭ تاپسىرماسىن ورىنداۋ ماقساتىنداعى بۇل يگى باستاما اۋدان تۇرعىندارىنىڭ كۇش-جىگەرىن بىرىكتىرۋگە باعىتتالعان. تازالىق ارقايسىمىزدان باستالادى. وسكەلەڭ ۇرپاققا ۇلگى بولاتىن وسىنداي اۋقىمدى شارالاردى قولداۋ – ءبارىمىزدىڭ ورتاق مىندەتىمىز، – دەدى اياگوز اۋداندىق ءماسليحاتىنىڭ دەپۋتاتى ايدار ءنادىرباي.
سونداي-اق، 25 تامىز كۇنى ماقانشى اۋدانىنداعى الاكول جاعالاۋىندا دا اۋقىمدى سەنبىلىك ءوتتى. بۇل اكتسياعا جەتى ۇيىم مەن مەكەمە وكىلدەرىن قوسا العاندا 150 ادام قاتىستى. تازالىق جۇمىستارىنا ەكى تەحنيكا تارتىلدى. ناتيجەسىندە 7,5 توننا تۇرمىستىق قاتتى قالدىق پوليگوندارعا شىعارىلدى.
