اباي وبلىسىندا شۇعىل شاقىرتۋعا بارا جاتقان ەكى ءورت ءسوندىرۋشى جول اپاتىنان كوز جۇمدى. قايعىلى وقيعاعا قاتىستى قىزمەتتىك تەكسەرۋ باستالدى، جاقىندارى باسشىلىقتىڭ ارەكەتىنە قۇقىقتىق باعا بەرۋدى سۇراپ وتىر، دەپ حابارلايدى "ادىرنا" ءتىلشىسى.
ينفورمبيۋرو تاراتقان اقپارات بويىنشا، وقيعا سەمەي–كۋرچاتوۆ تاسجولىندا بولعان. الدىن الا مالىمەت بويىنشا، ءورت ءسوندىرۋ ءبولىمىنىڭ قىزمەتكەرلەرى وتىرعان Chevrolet كولىگى قارسى باعىتقا شىعىپ كەتىپ، Kia كولىگىمەن سوقتىعىسقان. اپات سالدارىنان 36 جاستاعى ەرمەك سىدىقوۆ پەن 33 جاستاعى ارنۇر ادىكەنوۆ وقيعا ورنىندا قازا تاپتى.
مارقۇمداردىڭ تۋىستارى ءورت سوندىرۋشىلەردىڭ شۇعىل كومەككە اسىققانىن ايتادى. ولاردىڭ سوزىنشە، سەمەي مەن كۋرچاتوۆ اراسىنداعى شامامەن 130 شاقىرىم جولدى ءبىر ساعات ىشىندە ءجۇرىپ ءوتۋ تاپسىرىلعان. وسىعان بايلانىستى جاقىندارى باسشىلىقتىڭ ارەكەتىنە قۇقىقتىق باعا بەرۋدى سۇراپ وتىر.
ەرمەك سىدىقوۆتىڭ ارتىندا جۇبايى مەن كامەلەتكە تولماعان ەكى بالاسى قالدى. ارنۇر ادىكەنوۆتىڭ دە ايەلى مەن ءبىر بالاسى بار. جول اپاتىنان Kia كولىگىندە بولعان ەرلى-زايىپتى دا قازا تاپتى. ولاردىڭ ارتىندا التى بالا قالعان.
اباي وبلىسى توتەنشە جاعدايلار دەپارتامەنتى قازا بولعان قىزمەتكەرلەردىڭ وتباسىلارىنا قاجەتتى كومەك كورسەتىلىپ جاتقانىن حابارلادى. قازىر وقيعا بويىنشا قىزمەتتىك تەرگەپ-تەكسەرۋ باستالعان. ونىڭ قورىتىندىسى بويىنشا لاۋازىمدى تۇلعالاردىڭ ارەكەتىنە باعا بەرىلمەك.
سونىمەن قاتار جول-كولىك وقيعاسىنا قاتىستى پوليتسيا قىلمىستىق ءىس قوزعاپ، تەرگەۋ جۇرگىزىپ جاتىر.
