قارجىلىق مونيتورينگ اگەنتتىگى توراعاسىنىڭ ورىنباسارى جەڭىس ەلەمەسوۆ سەنات كۋلۋارىندا قوعامدا رەزونانس تۋدىرعان پەريزات قايراتتىڭ ىسىنە قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى.
قما وكىلىنىڭ ايتۋىنشا، پەريزات قايرات بىرنەشە قايىرىمدىلىق ماقساتىندا قاراجات جيناعان. ونىڭ ىشىندە وڭالتۋ ورتالىعىنىڭ قۇرىلىسى، پالەستيناداعى زارداپ شەككەندەرگە كومەك جانە بىلتىرعى سۋ تاسقىنىنىڭ سالدارىن جويۋعا ارنالعان قارجىلار بار. الايدا تەرگەۋ ناتيجەسىندە اتالعان قاراجاتتىڭ ماقساتتى جۇمسالماعانى انىقتالعان.
قارجىلىق مونيتورينگ اگەنتتىگى توراعاسىنىڭ ورىنباسارى جەڭىس ەلەمەسوۆ سەنات كۋلۋارىندا مالىمدەمە جاساپ، تەرگەۋ بارىسىندا كەلتىرىلگەن زالال سوماسى بىرنەشە رەت وزگەرگەنىن ايتتى. قازىرگى تاڭدا بۇل سوما 3,5 ميلليارد تەڭگە كولەمىندە بەلگىلەنگەن.
“قازىر تەرگەۋ اياقتالدى. جابىرلەنۋشىلەردىڭ ناقتى سانى بەلگىسىز. بىراق الاياقتىققا قاتىستى بىرنەشە ەپيزود بار. سونداي-اق قىلمىستىق جولمەن الىنعان قارجىنى اكتيۆتەرگە بىرىكتىرۋ فاكتىلەرى انىقتالدى،” – دەدى ەلەمەسوۆ.
قارجىلىق مونيتورينگ اگەنتتىگى پەريزات قايراتتىڭ اناسىن دا قىلمىستىق ىسكە تارتقان. ول قازىر ءۇي قاماقتا وتىر.
“پەريزات قايراتتىڭ اناسىن دا 190-باپ (“الاياقتىق”) جانە 218-باپ (“قىلمىستىق جولمەن الىنعان اقشانى زاڭداستىرۋ”) بويىنشا جاۋاپقا تارتۋ تۋرالى شەشىم قابىلداندى. ول قازىرگى تاڭدا ۇيقاماقتا وتىر،” – دەپ مالىمدەدى اگەنتتىك وكىلى.
ايتا كەتەيىك، پەريزات قايرات وزىنە تاعىلعان ايىپتاردى مويىنداماي وتىر. بۇعان دەيىن ونىڭ ىسىنە قاتىستى تەرگەۋدىڭ اياقتالعانى حابارلانعان بولاتىن.
