Qarjylyq monıtorıng agenttigi tóraǵasynyń orynbasary Jeńis Elemesov Senat kýlýarynda qoǵamda rezonans týdyrǵan Perızat Qaırattyń isine qatysty pikir bildirdi, dep habarlaıdy “Adyrna” ulttyq portaly.
QMA ókiliniń aıtýynsha, Perızat Qaırat birneshe qaıyrymdylyq maqsatynda qarajat jınaǵan. Onyń ishinde ońaltý ortalyǵynyń qurylysy, Palestınadaǵy zardap shekkenderge kómek jáne byltyrǵy sý tasqynynyń saldaryn joıýǵa arnalǵan qarjylar bar. Alaıda tergeý nátıjesinde atalǵan qarajattyń maqsatty jumsalmaǵany anyqtalǵan.
Qarjylyq monıtorıng agenttigi tóraǵasynyń orynbasary Jeńis Elemesov Senat kýlýarynda málimdeme jasap, tergeý barysynda keltirilgen zalal somasy birneshe ret ózgergenin aıtty. Qazirgi tańda bul soma 3,5 mıllıard teńge kóleminde belgilengen.
“Qazir tergeý aıaqtaldy. Jábirlenýshilerdiń naqty sany belgisiz. Biraq alaıaqtyqqa qatysty birneshe epızod bar. Sondaı-aq qylmystyq jolmen alynǵan qarjyny aktıvterge biriktirý faktileri anyqtaldy,” – dedi Elemesov.
Qarjylyq monıtorıng agenttigi Perızat Qaırattyń anasyn da qylmystyq iske tartqan. Ol qazir úı qamaqta otyr.
“Perızat Qaırattyń anasyn da 190-bap (“Alaıaqtyq”) jáne 218-bap (“Qylmystyq jolmen alynǵan aqshany zańdastyrý”) boıynsha jaýapqa tartý týraly sheshim qabyldandy. Ol qazirgi tańda úıqamaqta otyr,” – dep málimdedi agenttik ókili.
Aıta keteıik, Perızat Qaırat ózine taǵylǵan aıyptardy moıyndamaı otyr. Buǵan deıin onyń isine qatysty tergeýdiń aıaqtalǵany habarlanǵan bolatyn.
