Qarjylyq monitoring agenttıgı töraǧasynyŋ orynbasary Jeŋıs Elemesov Senat kuluarynda qoǧamda rezonans tudyrǧan Perizat Qairattyŋ ısıne qatysty pıkır bıldırdı, dep habarlaidy “Adyrna” ūlttyq portaly.
QMA ökılınıŋ aituynşa, Perizat Qairat bırneşe qaiyrymdylyq maqsatynda qarajat jinaǧan. Onyŋ ışınde oŋaltu ortalyǧynyŋ qūrylysy, Palestinadaǧy zardap şekkenderge kömek jäne byltyrǧy su tasqynynyŋ saldaryn joiuǧa arnalǧan qarjylar bar. Alaida tergeu nätijesınde atalǧan qarajattyŋ maqsatty jūmsalmaǧany anyqtalǧan.
Qarjylyq monitoring agenttıgı töraǧasynyŋ orynbasary Jeŋıs Elemesov Senat kuluarynda mälımdeme jasap, tergeu barysynda keltırılgen zalal somasy bırneşe ret özgergenın aitty. Qazırgı taŋda būl soma 3,5 milliard teŋge kölemınde belgılengen.
“Qazır tergeu aiaqtaldy. Jäbırlenuşılerdıŋ naqty sany belgısız. Bıraq alaiaqtyqqa qatysty bırneşe epizod bar. Sondai-aq qylmystyq jolmen alynǧan qarjyny aktivterge bırıktıru faktılerı anyqtaldy,” – dedı Elemesov.
Qarjylyq monitoring agenttıgı Perizat Qairattyŋ anasyn da qylmystyq ıske tartqan. Ol qazır üi qamaqta otyr.
“Perizat Qairattyŋ anasyn da 190-bap (“Alaiaqtyq”) jäne 218-bap (“Qylmystyq jolmen alynǧan aqşany zaŋdastyru”) boiynşa jauapqa tartu turaly şeşım qabyldandy. Ol qazırgı taŋda üiqamaqta otyr,” – dep mälımdedı agenttık ökılı.
Aita keteiık, Perizat Qairat özıne taǧylǧan aiyptardy moiyndamai otyr. Būǧan deiın onyŋ ısıne qatysty tergeudıŋ aiaqtalǧany habarlanǧan bolatyn.
Ūqsas jaŋalyqtar
