پەريزات قايراتتىڭ ءىسى بويىنشا تاركىلەنگەن Lexus LX 600 كولىگىنىڭ كىمگە بەرىلگەنىن استانا قالاسىنىڭ مەملەكەتتىك مۇلىك جانە جەكەشەلەندىرۋ دەپارتامەنتى ايتىپ بەردى. بۇل تۋرالى Informburo.kz جازدى، دەپ حابارلايدى “ادىرنا”.
قارا ءتۇستى، مەملەكەتتىك ءنومىرى 100PKO01 بولاتىن جول تالعامايتىن كولىك بويىنشا ساۋدا 2025 جىلدىڭ قاراشاسىندا وتكەن. اۆتوكولىك پەريزات قايراتتىڭ اناسى گايني الاشباەۆانىڭ اعاسىنىڭ اتىنا تىركەلگەن. وتكەن جىلدىڭ شىلدەسىندە سوت گايني الاشباەۆانى قىزىنا قايىرىمدىلىق ماقساتىندا جينالعان قاراجاتتى جىمقىرۋعا جانە زاڭداستىرۋعا كومەكتەسكەنى ءۇشىن جەتى جىلعا باس بوستاندىعىنان ايىرعان.
ەلەكتروندى ساۋدا پورتالىنداعى مالىمەتكە سايكەس، كولىكتىڭ باعالاۋ قۇنى 79 121 985 تەڭگە بولعان. ساۋداعا تەك مەملەكەتتىك مەكەمە نەمەسە كاسىپورىن نىسانىندا تىركەلگەن زاڭدى تۇلعالار، سونىڭ ىشىندە الەۋمەتتىك قىزمەت كورسەتۋ سۋبەكتىلەرى عانا قاتىسا العان.
ناتيجەسىندە تاركىلەنگەن كولىك پەريزات قايرات پەن ونىڭ اناسىنا قاتىستى ءىستى تەرگەگەن قارجىلىق مونيتورينگ اگەنتتىگىنىڭ (قما) بالانسىنا بەرىلدى.
«2025 جىلعى 13 قاراشاداعى وتىنىمدەردى قاراۋ ناتيجەلەرى تۋرالى حاتتاما، قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتىنىڭ 2025 جىلعى 1 جەلتوقسانداعى بۇيرىعى جانە 2025 جىلعى 1 جەلتوقسانداعى قابىلداۋ-تاپسىرۋ اكتىسى نەگىزىندە Lexus LX600 اۆتوكولىگى دەپارتامەنت ەسەبىنەن قما بالانسىنا بەرىلدى»، – دەلىنگەن جاۋاپتا.
بۇل ءىس بويىنشا تاركىلەنگەن وزگە مۇلىك ازىرگە مەملەكەتتىك ورگاندارعا بەرىلمەگەن. دەپارتامەنتتىڭ مالىمەتىنشە، اتالعان نىساندار:
- قۇقىق قورعاۋ جانە ارنايى مەملەكەتتىك ورگانداردىڭ;
- پرەزيدەنتكە تىكەلەي باعىناتىن جانە ەسەپ بەرەتىن، پرەزيدەنتتىڭ، ساياسي قىزمەتشىلەر مەن پارلامەنت دەپۋتاتتارىنىڭ قىزمەتىن قامتاماسىز ەتەتىن مەملەكەتتىك ورگاننىڭ قىزمەتتىك مىندەتتەرىن ورىنداۋ ءۇشىن پايدالانىلاتىن بولادى.
دەگەنمەن، قىمبات كولىكتىڭ اگەنتتىككە بەرىلگەنى كەي جەلى قولدانۋشىلارىنا ۇنامادى.
جەلىدە “اگەنتتىككە مۇنداي قىمبات ماشينانىڭ قاجەتى قانشا؟ وتاندىق اۆتوپروم كولىكتەرىن پايدالانباي ما؟ مۇنى ساتىپ، ءبىر اۋىلدىڭ جولىن جوندەپ بەرسىن”، دەگەن سەكىلدى پىكىرلەر جازۋدا.
ناۋرىز ايىنىڭ سوڭىندا استانا قالاسىنىڭ مەملەكەتتىك مۇلىك جانە جەكەشەلەندىرۋ دەپارتامەنتى تاعى ءبىر كولىكتى – مەملەكەتتىك ءنومىرى 777KPK01 بولاتىن قارا ءتۇستى Mercedes-Benz S450 اۆتوكولىگىن ساتۋعا شىعارۋ تۋرالى حابارلاندىرۋ جاريالادى. ساۋدا 7 ساۋىردە باستالادى.
ەسكە سالايىق، پەريزات قايرات 10 جىلعا باس بوستاندىعىنان ايىرىلعان بولاتىن. سونداي-اق ول قايىرىمدىلىق پەن مەيىرىمدىلىك ءۇشىن بەرىلەتىن «شاپاعات» مەدالىنەن ايىرىلدى. سوت ۇكىمىمەن پەريزات قايرات پەن ونىڭ اناسىنان 50 جابىرلەنۋشىنىڭ پايداسىنا جالپى سوماسى 1 ملرد 582 ملن تەڭگە كولەمىندە ماتەريالدىق شىعىن ءوندىرۋ مىندەتتەلدى. بۇدان بولەك، ولار ارقايسىسى 22 ملن تەڭگە مەملەكەتتىك باج جانە 698 مىڭ تەڭگە سوت شىعىندارىن تولەۋى ءتيىس.
