بۇگىن، 17 شىلدە كۇنى استانادا پەريزات قايراتقا قاتىستى وتكەن سوت وتىرىسىندا كۋاگەر تولعاناي بورانقۇل جاۋاپ بەردى، دەپ حابارلايدى «ادىرنا» ءتىلشىسى.
ول ايىپتالۋشىمەن العاش رەت 2021 جىلى كارانتين كەزىندە تانىسقانىن مالىمدەدى. ال 2022 جىلدىڭ قىركۇيەگىنەن باستاپ ولار تىعىز ارالاسا باستاعان. كۋاگەر ەكىنشى ايىپتالۋشى عايني الاشباەۆامەن 2022 جىلدىڭ جەلتوقسانىندا وتكەن Biz Birgemiz Qazaqstan فەستيۆالىندە جۇزدەسكەن. سول ۋاقىتتا پەريزات قايرات قايىرىمدىلىق قورىنىڭ قۇرىلتايشىسى بولعان.
تولعاناي ولاردىڭ قارىم-قاتىناسى تەك ىسكەرلىك ەمەس، دوستىق سيپاتتا دا بولعانىن اتاپ ءوتتى.
سوت بارىسىندا ايىپتاۋ تارابى پەريزات قايراتتىڭ تەلەفونىنان الىنعان 2023 جىلدىڭ 18 مامىرىنداعى حات الماسۋدى جاريا ەتتى. وندا ايىپتالۋشى قازاقستان ديپلومىن جاساتۋعا كومەكتەسۋدى سۇراعان.
«ول سىزدەن «ديپلوم جاساتۋعا كومەكتەسەتىن تانىستارىڭ بار ما؟» دەپ سۇرادى ما؟»— دەدى پروكۋرور.
كۋاگەر تولعاناي بورانقۇلوۆا بۇل حابارلامانىڭ وزىنە كەلگەنىن راستادى. ايتۋىنشا، ول ەكى جىل بۇرىن جازىلعان.
«سول ۋاقىتتا پەريزات ءبىر ءمينيستردىڭ كومەكشىسى بولىپ جۇمىسقا ورنالاسىپ جاتتۋ-اۋ. ول ديپلوم كەرەك ەكەنىن ايتتى. مەن ونى سىرتتاي وقۋعا ءتۇسۋ نەمەسە جاي عانا ديپلومدى راسىمدەتۋ نيەتى دەپ قابىلدادىم»،—دەدى كۋاگەر.
ايىپتالۋشى شەتەلدە ءبىلىم العانىن ايتىپ، قۇربىسىنان قازاقستاندا ديپلومدى قالاي زاڭداستىرۋعا بولاتىنىن سۇراعانىن جەتكىزدى.
تولعاناي بورانقۇلوۆ بۇل ءسوزدى راستاپ، پەريزاتتىڭ نوستريفيكاتسيا ءراسىمى تۋرالى سۇراعانىن مالىمدەدى.
بۇعان دەيىن پروكۋرور مادينا ورازالينا پەريزات قايراتتىڭ جوعارى ءبىلىمى جوق ەكەنىن ايتقان ەدى.
