بۇگىن، 14 شىلدەدە پەريزات قايرات ءىسى بويىنشا ءوتىپ جاتقان سوت پروتسەسىندە باستى ايىپتالۋشى الماتى قالاسىنىڭ ەكس-اكىمى باۋىرجان بايبەكتەن جاۋاپ الۋدى سۇرادى، دەپ حابارلايدى «ادىرنا» ءتىلشىسى.
پەريزات قايرات «BIZ BIRGEMIZ» قورى سول كەزدەگى «Nur Otan» پارتياسى جانىنان باۋىرجان بايبەكتىڭ باسشىلىعى كەزىندە قۇرىلعانىن اتاپ ءوتتى.
«قور قۇرىلتايشىلارىنان جاۋاپ الۋدان باستاۋدى سۇرايمىن، ويتكەنى ايىپتاۋ اكتىسىندە ءبىرىنشى ابزاتستان-اق مەنى اناممەن بىرگە قور قۇرىپ، ولاردىڭ قولىن ءوزى قويعان دەپ ايىپتايدى. ال بۇل قور بايبەك باسقارىپ تۇرعان كەزدە پارتيا جانىنان قۇرىلعان. مەنەن باسقا قۇرىلتايشىلاردىڭ كەيبىرى بۇرىن، ال كەيبىرى قازىرگى كۇنگە دەيىن پارتيادا قىزمەت ەتەدى»، – دەدى ول سوتتا.
ايتا كەتەيىك، باۋىرجان بايبەك 2019 جىلعا دەيىن الماتى قالاسىنىڭ اكىمى قىزمەتىن اتقارعان. كەيىن «Nur Otan» (قازىرگى «Amanat» — رەد.) پارتياسى توراعاسىنىڭ ءبىرىنشى ورىنباسارى لاۋازىمىنا اۋىسىپ، ول جەردە 2022 جىلدىڭ باسىنا دەيىن جۇمىس ىستەگەن.
