رەسەي جوعارعى سوتى “تاليبان” قوزعالىسىنىڭ ەلدەگى قىزمەتىنە تىيىم سالۋدى توقتاتىپ، راديكالدى اعىمدى تەرروريستىك ۇيىمدار تىزىمىنەن الىپ تاستادى. وسىلايشا، جوعارعى سوت رەسەي فەدەراتسياسى باس پروكۋراتۋراسىنىڭ شاعىمىن قاناعاتتاندىردى. بۇل تۋرالى ربك جازدى، دەپ حابارلايدى “ادىرنا” ۇلتتىق پورتالى.
باسىلىمنىڭ ناقتىلاۋىنشا، شەشىمدى سۋديا ولەگ نەفەدوۆ جاريالاعان وتىرىس جابىق رەجيمدە وتكەن، سوندىقتان تالاپ-ارىزدىڭ ەگجەي-تەگجەيى بەلگىسىز. تەك جۋرناليستەرگە سوت شەشىمى دەرەۋ ورىندالۋى ءتيىس ەكەنى ايتىلعان.
ايتا كەتەيىك، «تاليبان» 2003 جىلدان بەرى رەسەيدىڭ تەرروريستىك ۇيىمدار تىزىمىندە بولعان. ول كەزدە بۇل ۇيىمنىڭ شەشەنستانداعى زاڭسىز قارۋلى قۇرىلىمدارمەن بايلانىسى بار دەپ كورسەتىلگەن جانە تەررورلىق ادىستەردى قولداناتىنى ايتىلعان. سونداي-اق، قوزعالىس ۋساما بەن لادەننىڭ قولداۋىمەن ورتالىق ازيا ەلدەرىندە، سونىڭ ىشىندە وزبەكستان، تاجىكستان جانە قىرعىزستاندا بيلىكتى باسىپ الۋعا ۇمتىلعانى تۋرالى مالىمەتتەر بولعان.
الايدا ەندى جوعارعى سوت «تاليباندى» قارا تىزىمنەن الىپ تاستادى. ربك-نىڭ مالىمەتىنشە، بۇل — وتكەن جىلى «تەرروريزمگە قارسى ءىس-قيمىل تۋرالى» فەدەرالدىق زاڭعا ەنگىزىلگەن تۇزەتۋلەردەن كەيىن مۇنداي مارتەبەگە يە بولعان العاشقى ۇيىم. بۇل تۇزەتۋلەرگە سايكەس، ەگەر ۇيىم تەرروريزمدى ناسيحاتتاۋ، اقتاۋ، قولداۋ نەمەسە وسىنداي قىلمىستاردى جاساۋدى توقتاتسا، ونىڭ قىزمەتىنە تىيىم سالۋ سوت شەشىمىمەن توقتاتىلۋى مۇمكىن. ينيتسياتيۆا اۆتورلارى بۇل مەحانيزم زاڭداعى ولقىلىقتى جويۋ ءۇشىن قاجەت دەپ تۇسىندىرگەن.
وتكەن جىلدىڭ قاراشاسىندا، بۇل زاڭنامالىق تۇزەتۋلەر قارالماي تۇرىپ، رەسەي قاۋىپسىزدىك كەڭەسىنىڭ حاتشىسى سەرگەي شويگۋدىڭ اۋعانستاننىڭ ۆيتسە-پرەمەرى ابدۋل عاني بارادار احۋندپەن كەلىسسوز جۇرگىزگەنى حابارلانعان. كەلىسسوز بارىسىندا رەسەيلىك ساياساتكەر رەسەي اۋعانستانمەن ەكىجاقتى ىنتىماقتاستىقتى دامىتۋعا دايىن ەكەنىن جانە «تاليباندى» تەرروريستىك ۇيىمدار تىزىمىنەن شىعارۋ جوسپارلارى بار ەكەنىن، بۇل ساياسي جانە ەكونوميكالىق بايلانىستى نىعايتۋعا باعىتتالعانىن ايتقان.
ەسكە سالساق، 2003 جىلى بۇۇ قاۋىپسىزدىك كەڭەسى «تاليباندى» تەرروريستىك ۇيىمدار تىزىمىنە ەنگىزگەن. سول جىلى رەسەي دە قوزعالىستى وسىنداي تىزىمگە قوسقان بولاتىن.
2021 جىلدىڭ تامىزىندا «تاليبان» اۋعانستاندا بيلىكتى باسىپ الدى جانە سودان بەرى حالىقارالىق مويىنداۋعا قول جەتكىزۋگە تىرىسىپ كەلەدى. سول جىلدىڭ قازانىندا رەسەي پرەزيدەنتى ۆلاديمير پۋتين «تاليباندى» تەرروريستىك ۇيىمدار تىزىمىنەن شىعارۋ ماسەلەسى قاراستىرىلىپ جاتقانىن، بىراق بۇل قادامدى الدىمەن بۇۇ قاۋىپسىزدىك كەڭەسى جاساۋى كەرەك ەكەنىن ايتقان.
سول كەزدە رەسەي سىرتقى ىستەر مينيسترلىگىنىڭ ازيا ەلدەرى بويىنشا ەكىنشى دەپارتامەنتىنىڭ ديرەكتورى زامير كابۋلوۆ رەسەيلىك بيلىك تاراپىنان قوزعالىستى «دە-فاكتو» تانۋ پروتسەسى ءجۇرىپ جاتقانىن مالىمدەگەن. تىيىم سالىنعان قوزعالىس وكىلدەرى رەسەيگە ىسكەرلىك جانە جەكە ساپارلارمەن تۇراقتى تۇردە كەلىپ جۇرگەن.
