بۇگىن قارجى مونيتورينگى اگەنتتىگىنىڭ ءباسپاسوز قىزمەتى پەريزات قايرات پەن ونىڭ اناسى عايني الاشباەۆاعا قاتىستى جاڭا مالىمەتتەردى جاريا ەتتى، دەپ حابارلايدى “ادىرنا” ۇلتتىق پورتالى.
قما ەسەبىندە 2025 جىلدىڭ 14 ناۋرىزىندا پەريزات قايرات پەن ونىڭ اناسى عايني الاشباەۆانىڭ ارەكەتتەرى كەلەسىدەي دارەجەدە دەپ كورسەتىلگەن:
"ولارعا الاياقتىقتىڭ اسا ءىرى كولەمدە جاسالۋىنا جانە قىلمىستىق جولمەن الىنعان قاراجاتتى زاڭداستىرۋعا كۇدىكتى دەپ تانىلدى".
پەريزات قايرات 2021-2024 جىلدار ارالىعىندا قايىرىمدىلىق كومەك كورسەتۋ ماقساتىندا حالىقتان اقشا جيناعان. ونىڭ ايتۋىنشا، بۇل قاراجاتتار مۇقتاج بالالارعا، پالەستينا جانە سۋ تاسقىنىنان زارداپ شەككەندەرگە كومەك كورسەتۋ ءۇشىن جۇمسالماق بولعان.
تەرگەۋ امالدارىنىڭ ناتيجەسىنە ساي، جالپى ۇرلانعان قارجى كولەمى 3,5 ملرد تەڭگەنى قۇرادى.
پەريزات قايرات "Biz Birgemiz Qazaqstan 2030" قورىنا تۇسكەن قاراجاتتى ءوز جەكە جانە اناسى عايني الاشباەۆانىڭ ەسەپشوتتارىنا اۋدارىپ، كەيىن ولاردى زەرگەرلىك بۇيىمدارعا، كيىم-كەشەككە، جيھاز بەن ساياحاتتارعا، جوندەۋ قىزمەتتەرىنە، اۆتوكولىك جالداۋ جانە باسقا دا شىعىندارعا جۇمساعان.
ەسكە سالساق، 2024 جىلى 1 ءساۋىر مەن 15 قاراشا ارالىعىندا پەريزات قايرات سۋ تاسقىنىنان زارداپ شەككەندەرگە كومەك كورسەتۋ ماقساتىندا "Biz Birgemiz Qazaqstan 2030" قق-نىڭ ەسەپشوتىنا 2,8 ملرد تەڭگە جينالىپ جىمقىرىلعانى انىقتالدى.
"قىلمىستىق تابىستى جىمقىرۋ ماقساتىندا ول 16 سەرىكتەس جەكە كاسىپكەرلەرمەن مەتالدان جاسالعان كيىز ۇيلەر، قايىقتار، ەتىكتەر جانە باسقا دا زاتتاردى جەتكىزۋ جونىندە جالعان كەلىسىمدەر جاساسقان. الايدا بۇل كەلىسىمدەر ءىس جۇزىندە ورىندالماعان”، دەلىنگەن قما ءباسپاسوز قىزمەتى حابارلاماسىندا.
