جامبىل وبلىسىنىڭ اكىمى ەربول قاراشوكەەۆ جەر سىلكىنىسىنەن زارداپ شەككەن مەركى جانە ت.رىسقۇلوۆ اۋداندارىندا تابيعي اپاتتىڭ سالدارىن جويۋ بويىنشا جەدەل شتاب وتىرىسىن وتكىزدى، دەپ حابارلايدى “ادىرنا” ۇلتتىق پورتالى.
جيىندا اۋدان اكىمدەرى جاعدايعا قاتىستى ەسەپ بەردى. زارداپ شەككەن ازاماتتار تىركەلمەگەن، بارلىق نىسان قالىپتى رەجيمدە جۇمىس ىستەپ تۇر. دەگەنمەن، مەركى جانە ت.رىسقۇلوۆ اۋداندارىندا 14 الەۋمەتتىك نىساننىڭ ءىشىنارا زاقىمدانعانى انىقتالدى. ونىڭ ىشىندە 9 ءبىلىم بەرۋ مەكەمەسى، 2 دەنساۋلىق ساقتاۋ نىسانى، 1 الەۋمەتتىك قورعاۋ ورتالىعى، 1 سپورت كەشەنى جانە 1 مادەنيەت ءۇيى بار.
قازىرگى تاڭدا قوسىمشا بۇلىنگەن نىسانداردى انىقتاۋ جانە زەردەلەۋ جۇمىستارى جالعاسۋدا. اۋدان اكىمدەرىنە بارلىق اۋىلدىق ەلدى مەكەندەردى ارالاپ، جاعدايدى ءوز كوزدەرىمەن كورۋ، تۇرعىندار اراسىندا ءتۇسىندىرۋ جۇمىستارىن جۇرگىزۋ جانە قاجەت بولعان جاعدايدا پسيحولوگيالىق كومەك كورسەتۋ تاپسىرىلدى.
وبلىس اكىمى ەربول قاراشوكەەۆ الەۋمەتتىك جەلىلەر مەن بۇقارالىق اقپارات قۇرالدارىندا تاراعان جالعان اقپاراتتارعا نازار اۋدارىپ، تۇرعىنداردى تەك رەسمي دەرەككوزدەرگە سەنۋگە شاقىردى.
“تۇرعىنداردى الاڭداتقان ماسەلە – مەركى اۋدانىنا تەحنيكالاردىڭ كەلۋى مەن ۋاقىتشا شاتىرلاردىڭ ورناتىلۋى. بۇل توتەنشە جاعدايلاردىڭ الدىن الۋ الگوريتمىنە سايكەس جۇرگىزىلىپ جاتقان شارالار. الاڭداۋعا نەگىز جوق. بارلىق جۇمىستار قاۋىپسىزدىكتى قامتاماسىز ەتۋ ماقساتىندا اتقارىلۋدا،” – دەلىنگەن اكىمدىك حابارلاماسىندا.
ايتا كەتەيىك، 28 ناۋرىز كۇنى تۇندە جامبىل وبلىسىنىڭ بىرقاتار اۋدانى مەن تاراز قالاسىندا جەر سىلكىنىسى تىركەلدى. جەر استى دۇمپۋلەرىنىڭ ەڭ جوعارعى كۇشى مەركى اۋدانىندا 5 باللعا جەتتى. ت.رىسقۇلوۆ اۋدانىندا 4 بالل، ال تاراز قالاسى مەن باسقا اۋدانداردا 2 بالل شاماسىندا بولدى.
جەر سىلكىنىسى 15:56-دا قايتا سەزىلدى. قازىرگى تاڭدا وبلىس اكىمىنىڭ تاپسىرماسىنا سايكەس جەدەل شتاب جۇمىسىن جالعاستىرۋدا.
