مەملەكەت باسشىسىنىڭ ەل ەكونوميكاسىنا قوماقتى ينۆەستيتسيا تارتۋ، تەرەڭ وڭدەۋدى دامىتۋ جانە وڭدەۋ ونەركاسىبىنىڭ ۇلەسىن ارتتىرۋ جونىندەگى تاپسىرمالارى جامبىل وبلىسىندا ناقتى جوبالار مەن ناتيجەلى جۇمىستار ارقىلى جۇزەگە اسىرىلۋدا.
2026 جىلدىڭ قاڭتار-ناۋرىز ايلارىنىڭ قورىتىندىسى بويىنشا ايماقتا ينۆەستيتسيالىق بەلسەندىلىكتىڭ وڭ سەرپىنى بايقالادى. نەگىزگى كاپيتالعا سالىنعان ينۆەستيتسيالار كولەمى 218,1 ملرد تەڭگەنى قۇرادى، بۇل وتكەن جىلدىڭ سايكەس كەزەڭىمەن سالىستىرعاندا 71,6%-عا ارتىق. بۇل تۇرعىدا ءوسۋ قارقىنى بويىنشا رەسپۋبليكادا ءبىرىنشى ورىندى يەلەنىپ، ء وڭىر ەكونوميكالىق دامۋدىڭ تۇراقتىلىعىن ساقتاپ وتىر.
سونداي-اق جەكە ينۆەستيتسيالاردىڭ ارتۋى دا ەرەكشە ماڭىزعا يە ەكەنى بەلگىلى. ولاردىڭ كولەمى 214,3 ملرد تەڭگەگە جەتىپ، وتكەن جىلمەن سالىستىرعاندا 205,5%-عا ءوستى. بۇل كورسەتكىش بويىنشا وبلىس رەسپۋبليكادا ەكىنشى ورىنعا شىقتى.
وڭدەۋ ونەركاسىبىندە دە ايتارلىقتاي ءوسىم بار. اتالعان سالاعا سالىنعان ينۆەستيتسيالار كولەمى 140,7 ملرد تەڭگەنى قۇراپ، 2,7 ەسەگە ۇلعايدى. ناتيجەسىندە جامبىل وبلىسى رەسپۋبليكادا ءبىرىنشى ورىنعا كوتەرىلىپ، ەلدەگى وسى سالاعا سالىنعان ينۆەستيتسيالاردىڭ جالپى كولەمىنىڭ 28%-ىن قامتاماسىز ەتتى.
جالپى قول جەتكىزىلگەن ناتيجەلەر 2025 جىلى قالىپتاسقان وڭ ءۇردىستى جالعاستىرۋدا.
اتاپ ايتساق، 2025 جىلدىڭ قورىتىندىسى بويىنشا جامبىل وبلىسىنا 289,7 ملن اقش دوللارى تىكەلەي شەتەلدىك ينۆەستيتسيالار تارتىلدى. بۇل وتكەن جىلدىڭ سايكەس كەزەڭىمەن سالىستىرعاندا 8,5 ەسە كوپ. ءوسۋ قارقىنى بويىنشا ءوڭىر رەسپۋبليكادا ءبىرىنشى ورىندى يەلەندى.
بۇدان بولەك، جوسپارلى كورسەتكىش (ينديكاتور — 86 ملن اقش دوللارى) 3,3 ەسەگە ارتىعىمەن ورىندالىپ، ءوڭىردىڭ شەتەلدىك ينۆەستورلار ءۇشىن تارتىمدىلىعى جوعارى ەكەنىن ناقتى كورسەتتى.
ينۆەستيتسيا كولەمىنىڭ تۇراقتى ءوسىمى وبلىستا جۇرگىزىلىپ جاتقان ەكونوميكالىق ساياساتتىڭ ناتيجەلى ەكەنىن اڭعارتادى. جامبىل وبلىسى ينۆەستيتسيا تارتۋ باعىتىندا ءوز ورنىن نىعايتىپ، ونەركاسىپتىڭ ودان ءارى دامۋىنا جول اشىپ وتىر.
ۇقساس جاڭالىقتار
