جامبىل وبلىسىندا جەر سىلكىنىسىنەن 30-دان استام عيمارات زارداپ شەكتى. ولاردىڭ قاتارىندا الەۋمەتتىك نىساندار مەن تۇرعىن ۇيلەر بار. بۇل تۋرالى جامبىل وبلىسى اكىمدىگى مالىمدەدى، دەپ حابارلايدى “ادىرنا” ۇلتتىق پورتالى.
الدىن الا مالىمەت بويىنشا، 28 ناۋرىزدا مەركى جانە ت.رىسقۇلوۆ اۋداندارىندا ونداعان عيماراتتىڭ بۇلىنگەنى انىقتالدى.
زاقىمنىڭ شامامەن ۇشتەن ءبىرى مەركى اۋدانىنداعى قۇرىلىس نىساندارىنا كەلتىرىلگەن. اقەرمان، مەركى، سۇرات اۋىلدارىنداعى ورتالىق اۋداندىق اۋرۋحانا مەن ونىڭ مەديتسينالىق پۋنكتتەرىنىڭ عيماراتتارىنىڭ قابىرعالارى زاقىمدانعان. ەكى اۋىلدىق وكرۋگتەگى دارىگەرلىك امبۋلاتوريا مەن فەلدشەرلىك-اكۋشەرلىك پۋنكتتەردە جارىقتار انىقتالدى.سونداي-اق جاڭاتوعان كەنتىندەگى مۇمكىندىگى شەكتەۋلى بالالارعا ارنالعان وڭالتۋ جانە بەيىمدەۋ ورتالىعى، بالاباقشا، اسحانا جانە ءبىر تۇرعىن ءۇي زارداپ شەكتى.
ت. رىسقۇلوۆ اۋدانىندا 20-دان استام زاقىمدالعان عيمارات انىقتالدى. ولاردىڭ ىشىندە 10 الەۋمەتتىك وبەكت بار — 4 مەكتەپ، 3 بالاباقشا، مادەنيەت ءۇيى، مەديتسينالىق پۋنكتەر جانە سپورت كەشەنى، سونداي-اق 11 تۇرعىن ءۇي.
قازىرگى ۋاقىتتا قۇربان بولعاندار تۋرالى حابارلامالار تۇسكەن جوق.
ايماقتاعى تاۋلىك بويى جۇمىس ىستەيتىن «جەدەل جەلىگە» 12 قوڭىراۋ كەلىپ تۇسكەن. تۇرعىندار دۇمپۋلەر قايتالانا ما دەپ قاۋىپتەنەدڭ، الايدا ماماندار قاۋىپتىڭ سەيىلگەنىن مالىمدەۋدە.
جامبىل وبلىسىنداعى عيماراتتاردى تەكسەرۋگە 120 ادام مەن 73 ارنايى تەحنيكا جۇمىلدىرىلدى. كوميسسيا جۇمىسى جالعاسۋدا، ونىڭ قۇرامىنا قر تجم سەيسمولوگيالىق مونيتورينگ ۇلتتىق عىلىمي ورتالىعىنىڭ وكىلدەرى دە كىرگەن.
“250 كەلىگە جۋىق اممياك ساقتالعان «مەركى» ىرىمشىگى زاۋىتىنداعى حيميالىق قاۋىپتى نىساندا ەشقانداي زاقىم انىقتالعان جوق. زارداپ شەككەن ايماقتا باسقا بيولوگيالىق نەمەسە رادياتسيالىق قاۋىپتى وبەكتىلەر جوق. تىرشىلىكتى قامتاماسىز ەتۋدىڭ بارلىق نىساندارى، گاز تاسىمالداۋ جۇيەسى مەن قاۋىپتى وندىرىستىك نىساندار قالىپتى رەجيمدە جۇمىس ىستەۋدە.
جول ينفراقۇرىلىمى، تەمىرجول جەلىلەرى، شاحتالار مەن قازبالاردا زاقىمدار مەن بۇزىلۋلار انىقتالعان جوق»، — دەدى جامبىل وبلىسى اكىمىنىڭ ورىنباسارى قاناتبەك ماديبەك.
سونداي-اق، ول ت. رىسقۇلوۆ اۋدانىندا مۇنداي كۇشتى جەر سىلكىنىسى سوڭعى رەت 2003 جىلى بولعانىن، ال مەركەن اۋدانىندا بۇل جاعداي 160 جىلدان استام ۋاقىت بۇرىن بولعانىن اتاپ ءوتتى.
سونىمەن قاتار، قازاقستان پرەزيدەنتى قاسىم-جومارت توقاەۆ جامبىل وبلىسىنىڭ اكىمى ەربول قاراشوكەەۆ پەن توتەنشە جاعدايلار ءمينيسترى شىڭعىس ءارىنوۆتىڭ وڭىردەگى جەر سىلكىنىسىنەن كەيىنگى احۋال بويىنشا باياندامالارىن تىڭدادى.
“مەملەكەت باسشىسى پرەمەر-مينيستر ولجاس بەكتەنوۆكە الەۋمەتتىك نىساندار مەن تۇرعىن ۇيلەردى قالپىنا كەلتىرۋ جانە جوندەۋ جۇمىستارىن جۇرگىزۋ ءۇشىن قاجەتتى كومەك كورسەتۋدى تاپسىردى. ۇكىمەت وبلىستاعى احۋالدى باقىلاۋعا الدى”، — دەلىنگەن اقوردانىڭ ءباسپاسوز قىزمەتى تاراتقان اقپاراتتا.
ەسكە سالساق، بۇگىن ساعات 16:00 شاماسىندا جامبىل وبلىسىندا تاعى دا جەر سىلكىندى.
بۇعان دەيىن وڭىردە العاشقى جەر سىلكىنىسى 03:42–دە تىركەلگەنى بەلگىلى بولدى. ەسەپتەلگەن قارقىندىلىعى مەركى اۋىلىندا — 5.0 بالل، قۇلان اۋىلىندا — 4.0 بالل.
توتەنشە جاعدايدان كەيىن، ۇكىمەتتىك جۇمىس توبى جاعدايدى ساراپتاپ، باعالاۋ جانە شارا قولدانۋ ءۇشىن جامبىل وبلىسىنا جىبەرىلدى.
ەسكە سالايىق، بۇگىن ميانمادس دا 7,9 بالدىق جەر سىلكىنىسى تىركەلدى.
