Jambyl oblysynyń ákimi Erbol Qarashókeev jer silkinisinen zardap shekken Merki jáne T.Rysqulov aýdandarynda tabıǵı apattyń saldaryn joıý boıynsha jedel shtab otyrysyn ótkizdi, dep habarlaıdy “Adyrna” ulttyq portaly.
Jıynda aýdan ákimderi jaǵdaıǵa qatysty esep berdi. Zardap shekken azamattar tirkelmegen, barlyq nysan qalypty rejımde jumys istep tur. Degenmen, Merki jáne T.Rysqulov aýdandarynda 14 áleýmettik nysannyń ishinara zaqymdanǵany anyqtaldy. Onyń ishinde 9 bilim berý mekemesi, 2 densaýlyq saqtaý nysany, 1 áleýmettik qorǵaý ortalyǵy, 1 sport kesheni jáne 1 mádenıet úıi bar.
Qazirgi tańda qosymsha búlingen nysandardy anyqtaý jáne zerdeleý jumystary jalǵasýda. Aýdan ákimderine barlyq aýyldyq eldi mekenderdi aralap, jaǵdaıdy óz kózderimen kórý, turǵyndar arasynda túsindirý jumystaryn júrgizý jáne qajet bolǵan jaǵdaıda psıhologııalyq kómek kórsetý tapsyryldy.
Oblys ákimi Erbol Qarashókeev áleýmettik jeliler men buqaralyq aqparat quraldarynda taraǵan jalǵan aqparattarǵa nazar aýdaryp, turǵyndardy tek resmı derekkózderge senýge shaqyrdy.
“Turǵyndardy alańdatqan másele – Merki aýdanyna tehnıkalardyń kelýi men ýaqytsha shatyrlardyń ornatylýy. Bul tótenshe jaǵdaılardyń aldyn alý algorıtmine sáıkes júrgizilip jatqan sharalar. Alańdaýǵa negiz joq. Barlyq jumystar qaýipsizdikti qamtamasyz etý maqsatynda atqarylýda,” – delingen ákimdik habarlamasynda.
Aıta keteıik, 28 naýryz kúni túnde Jambyl oblysynyń birqatar aýdany men Taraz qalasynda jer silkinisi tirkeldi. Jer asty dúmpýleriniń eń joǵarǵy kúshi Merki aýdanynda 5 ballǵa jetti. T.Rysqulov aýdanynda 4 ball, al Taraz qalasy men basqa aýdandarda 2 ball shamasynda boldy.
Jer silkinisi 15:56-da qaıta sezildi. Qazirgi tańda oblys ákiminiń tapsyrmasyna sáıkes jedel shtab jumysyn jalǵastyrýda.
