جامبىل وبلىسىندا مەكتەپ وقۋشىلارىنىڭ جاپپاي ۋلانۋى ورىن الدى، - دەپ حابارلايدى "ادىرنا" ءتىلشىسى وبلىس اكىمىنىڭ ءباسپاسوز قىزمەتىنە سىلتەمە جاساپ.
بەلگىلى بولعانداي، سارىكەمەر اۋىلىنداعى ن.كيىكباەۆ اتىنداعى مەكتەپ-گيمنازياسىنىڭ وقۋشىسى تاراپىنان السىزدىك جانە قۇسۋعا قاتىستى ءبىرىنشى شاعىم قاراشانىڭ 7-ءسى كۇنى تۇستەن كەيىن تىركەلگەن. رەسپۋبليكالىق جانە وبلىستىق مامانداردان: انەستەزيولوگتار، پەدياترلار، توكسيكولوگتار، ينفەكتسيونيست مامانداردان كوميسسيا قۇرىلدى.
"ساعات 23:00-گە دەيىن ءوتىنىش بىلدىرگەندەردىڭ جالپى سانى 46 ادامدى قۇرادى (ونىڭ ىشىندە 2 مۇعالىم، 44 بالا). 46 ادامنىڭ 35-ءى اۋرۋحاناعا جاتقىزىلدى، جاعدايى ورتاشا، تۇراقتى. اۋرۋحاناعا جاتقىزىلعاندارعا دەتوكسيكاتسيا تەراپياسى جۇرگىزىلدى. 13 ادام دارىگەرلىك كەڭەس العاننان كەيىن امبۋلاتورلىق ەمدەۋگە جانە باقىلاۋعا جىبەرىلدى، انتيبيوتيكالىق تەراپيا قاجەت ەمەس»، - دەلىنگەن حابارلامادا.
جالپى تاجىريبە دارىگەرلەرى، پەدياتر، ۋچاسكەلىك مەدبيكەدەن تۇراتىن 16 ءموبيلدى توپ ۇيىمداستىرىلىپ، سول كۇنى وسى ءبىلىم وشاعىنداعى اسحاناعا كەلگەن 205 وقۋشىنىڭ ءۇيدى-ءۇيىن ارالاۋ جۇرگىزىلدى. اتالعان بالالاردى تەكسەرۋ قورىتىندىسى بويىنشا ولاردىڭ جاعدايى قاناعاتتانارلىق دەپ باعالانىپ، شاعىمدارى مەن بەلگىلەرى تىركەلمەدى.
"ن.كيىكباەۆ اتىنداعى مەكتەپ-گيمنازياسىنىڭ مەكتەپ تاماعىنا جاۋاپتى جەكە كاسىپكەر توقسەيىتوۆتىڭ جۇمىسى ءمان-جاي انىقتالعانشا توقتاتىلدى. مەكتەپ قورشالىپ، باكتەريولوگيالىق زەرتتەۋ جۇرگىزىلۋدە", - دەپ حابارلايدى ءباسپاسوز قىزمەتى.