2025 جىلدىڭ ناۋرىز ايىندا وتكەن اقىلى ءبىلىم الۋعا ارنالعان ۇبت-دا ءۇش وقۋشى ەڭ جوعارى140 بالل جيناپ، ۇزدىك ناتيجە كورسەتتى.
ەڭبەكشىقازاق اۋدانىنىڭ تولقىن ورتا مەكتەبىنىڭ 11 سىنىپ وقۋشىسى سانجار قۋاندىق – تەستىلەۋدەن ەڭ جوعارى بالل جيناعان العاشقىلاردىڭ ءبىرى. سانجار قازاق ءتىلى مەن ادەبيەتى پاندەرىن تاڭداعان. الماتى قالاسىنداعى №126 مامانداندىرىلعان ليتسەيىنىڭ جانە «تاريح مەكتەبى» ونلاين دايىندىق ورتالىعىنىڭ 11-سىنىپ وقۋشىسى جانبولات سارسەنباي دا ەڭ جوعارى 140 بالل جينادى. JUZ40 كۋرسىنىڭ تۇلەگى، استانالىق تۇلەك اياگوز اقانوۆادا 140 بالل جيناپ، ۇزدىك ناتيجە كورسەتتى. ۇبت-دا مۇمكىن بولعان ەڭ جوعارى بالل جيناۋ ءۇشىن نە ىستەۋ كەرەك؟ جاس تۇلەكتەر وقيعامەن ءبولىستى.
سانجار قۋاندىق
– ۇبت-عا دايىندىقتى قاشان باستادىڭىز?
– JUZ40 كۋرسىنا كەلمەس بۇرىن مەنىڭ بازالىق ءبىلىمىم قازاق ءتىلى مەن ادەبيەتى بويىنشا جاقسى بولدى. سوندىقتان بۇل پاندەردى تاڭداۋدى شەشتىم. العاشقى ىرىكتەۋ تەستىندە 88 بالل جينادىم، سودان كەيىن جۇيەلى دايىندىققا كىرىستىم.
– دايىندىق بارىسىندا كۇنىنە قانشا ۋاقىت وقىدىڭىز?
– كۇندە 9 ساعات ۇيىقتادىم. تەوريالىق تەستتەردى تالدايتىن كۇندەرى تاڭعى 7:00-دەن تۇسكى 12:00-گە دەيىن ساباق وقىدىم. 15:00-تەن 18:30-عا دەيىن ساباققا قاتىستىم. ءۇيىم الىس بولعاندىقتان، كەش قايتىپ، بىردەن ۇيىقتاپ قالاتىنمىن. باسقا كۇندەرى تۇسكى ۋاقىتتا 1 ساعات دەمالىپ، سودان كەيىن توقتاماي ساباق وقىدىم. سەبەبى 4 باسپانىنىڭ كىتاپتارىن وقۋ قيىن، ال قازاق ءتىلى مەن ادەبيەتىنە كوپ ۋاقىت ءبولۋ كەرەك.
– قانداي پاندەر قيىندىق تۋعىزدى؟
– ماعان ەڭ قيىن بولعانى – قازاق ادەبيەتى مەن تاريح. بۇل پاندەردە قينالعان سەبەبىم – مەكتەپتە باسقا باعدارلاما بويىنشا وقىدىق. ال ۇبت سەرتيفيكاتسياسىنداعى سۇراقتار باسقاشا بولدى. ادەبيەتتە ەڭ قيىنى – اۆتورلار، شىعارمالار، تاريحي كەزەڭدەر، داتالار سياقتى اقپاراتتاردى ەستە ساقتاۋ.
– قوبالجۋ بولدى ما?
– ءبىر اي بويى ءوزىمدى 140 بالل الاتىنىما سەندىرۋگە تىرىستىم. كۇن سايىن وسىنى ويلاپ، جوسپار قۇرىپ، ارەكەت جاسادىم. سونىڭ ارقاسىندا ۇبت كەزىندە قوبالجۋ بولعان جوق.
– ۇبت كەزىندە قانداي سەزىمدە بولدىڭىز؟
– كۇلىپ كىردىم. سەبەبى ءوزىمنىڭ 139 بالل جينايتىنىما سەنىمدى بولدىم. تەك سوڭعى ءبىر سۇراق 1 باللدى شەشەتىن ساتتە 40 مينۋت ويلاندىم. تەستتى اياقتاۋ باتىرماسىن باسار كەزدە قاتتى قوبالجىدىم. قول-اياعىم دىرىلدەپ، بەتىمدى جۋىپ كەلدىم. «اياقتاۋ» دەگەن بەلگىشەنى باسقانىمدا, 140 باللدى كورگەن ءساتتەگى سەزىمدى ايتىپ جەتكىزۋ قيىن.
– بولاشاقتاعى جوسپارىڭىز قانداي؟
– قازاق ءتىلى مەن ادەبيەتى ءپانىنىڭ مۇعالىمى بولعىم كەلەدى. الداعى ۋاقىتتا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنە وقۋعا ءتۇسۋ جوسپارىمدا بار.
– ۇبت-عا دايىندالىپ جۇرگەندەرگە قانداي كەڭەس بەرەسىز؟
– ەڭ باستىسى – جۇيەلى دايىندىق. قيىن پاندەردەن قاشپاۋ كەرەك، كەرىسىنشە سولارعا كوبىرەك كوڭىل ءبولۋ كەرەك. موتيۆاتسيا – ۋاقىتشا نارسە، باستىسى – ءتارتىپ. ەگەر ناقتى ماقسات قويساڭ، جەتىستىككە جەتۋگە بولادى.
جانبولات سارسەنباي
– جانبولات، الداعى ۋاقىتتا قايدا وقۋعا تۇسكىڭىز كەلەدى؟
– 2025 جىلدىڭ ناۋرىز ايىندا دۇنيەجۇزى تاريحى مەن اعىلشىن ءتىلى بويىنشا ۇبت-دان 140 بالل جينادىم. قازىر كوزدەپ وتىرعان وقۋ ورىندارىم – ماقسۇت نارىكباەۆ اتىنداعى قازاق گۋمانيتارلىق زاڭ ۋنيۆەرسيتەتءى جانە سۇلەيمەن دەميرەل ۋنيۆەرسيتەتى.
– ۇبت-عا دايىندىقتى قاشان باستادىڭىز?
– 10 سىنىپتان باستاپ ۇبت-عا دايىندالا باستادىم. اعىلشىن تىلىنە ەرەكشە كوڭىل ءبولدىم، سەبەبى بۇل ءپان بويىنشا دەڭگەيىم تومەن بولدى. سونىمەن قاتار، IELTS تاپسىرۋ ءمىندەتتى بولدى. سوندىقتان بۇكىل 10 سىنىپ بويى وسى ەمتيحانعا دايىندالدىم. جازدا 6.5 بالل جينادىم.
– قانداي ءپان قيىنعا سوقتى؟
– ماعان ەڭ قيىنى – دۇنيەجۇزى تاريحى بولدى. سەبەبى بۇل پاندە وتە كوپ اقپارات بار. بۇكىل كىتاپتاردى قامتىپ، ارنايى ۇبت سۇراقتارى جيناقتالعان ماتەريالداردى وقۋىم قاجەت بولدى. بۇل مەن ءۇشىن وتە اۋىر بولدى، بىراق بارىمدى سالىپ دايىندالدىم.
– دايىندىق كەستەڭءىز قالاي بولدى؟
– ءار پانگە 2-3 ساعاتتاي ۋاقىت ءبولدىم، ال دۇنيەجۇزى تاريحىنا كۇن سايىن 6-7 ساعات ارنادىم.
– ۇبت-عا دايىندىق بارىسىندا باستى ۇستانىم قانداي بولدى?
– ەڭ باستىسى – ءتارتىپ. الدىما ماقسات قويدىم جانە سول ماقساتتىڭ جەڭىسىن كورگەنشە تارتىپپەن ءجۇردىم. ۋاقىتتى ءتيىمدى پايدالانۋ ءۇشىن ناقتى جوسپار قۇرۋ كەرەك دەپ ويلايمىن. مەن ءار كۇنىمدى «نۇسقا تالدايمىن، كىتاپتىڭ وسىنشا بەتىن وقيمىن» دەپ ارنايى جازىپ ءجۇردىم.
دەمالىس تا وتە قاجەت. ەگەر ادامعا ارتىق جۇكتەمە تۇسسە، ول كەرىسىنشە، دەپرەسسياعا ءتۇسىپ كەتۋى مۇمكىن. سوندىقتان دەمالىستى دا دۇرىس جوسپارلاۋ كەرەك.
- سۇحباتىڭىزعا راقمەت! الداعى بىرىڭعاي گرانت تەستىلەۋىنە ساتتىلىك تىلەيمىز!
سىمبات ناۋحان
«ادىرنا» ۇلتتىق پورتالى
