ۇلتتىق بىرىڭعاي تەستىلەۋگە ءوز ورنىنا بوتەن بىرەۋدى وتكىزبەك بولعان 4 وقۋشىنىڭ ۇستىنەن قىلمىستىق ءىس قوزعالعان دەپ حابارلايدى "ادىرنا" ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ.
الگى تورتەۋدىڭ اراسىندا جاقسى ۇلگەرىمىمەن كوزگە تۇسكەن «التىن بەلگى» يەلەرى دە بار. ولار جالعان قۇجات جاساپ، ورنىنا وزگە ادامدى وتكىزبەك بولعاندارى ءۇشىن ۇستالعان.
ۇلتتىق تەستىلەۋ ورتالىعىنىڭ مالىمەتىنشە، قازىر اتالعان دەرەك بويىنشا سوتقا دەيىنگى تەرگەۋ باستالعان. جالپى بيىل ەلىمىزدە 190 مىڭ تۇلەك مەملەكەتتىك ەمتيحاننان ءوتىپ، تەستىلەۋ ناتيجەسىمەن تانىسقان.
ۇلتتىق تەستىلەۋ ورتالىعى باسشىسىنىڭ ورىنباسارى ناۋجان ديداربەكوۆانىڭ ايتۋىنشا، تۇلەكتەرگە سىناق تاسىرۋعا ەكى مۇمكىندىك بەرىلەدى. دەگەنمەن تالاپ قاتال. سەبەبى كامەراعا وقۋشىنىڭ جاۋاپتى كوشىرگەنى جازىلسا، بىردەن تەست تاپسىرۋ مۇمكىندىگىنەن ايىرىلادى.
«وتە قاتتى قيىن سۇراقتار جوق. مىسالى، ماتەماتيكانى سالىستىراتىن بولساق، كورشى ەلدەرمەن سالىستىرساق، ەڭ جەڭىل ماتەماتيكا تەستتەرى بىزدە دەپ ايتۋعا بولادى، وندا دا 11-سىنىپتارعا ارنالعان. سوندىقتان قاتال تۇردە وتكەنى دۇرىس دەپ ويلايمىن»، — دەيدى ءبىلىم بەرۋ ورتالىعىنىڭ باسشىسى بوگەنباي سەرىكباي.
الايدا سوعان قاراماستان، جىلداعى داستۇردەن جاڭىلماي، قيتۇرقى ارەكەتتەرگە بارعان تۇلەكتەردى دە كەزدەستىرۋگە بولادى. ولار ءوز حالدەرىنشە كومەكشى قۇرالدارعا جۇگىنبەك بولعان.
«بىزدە ءبىر تەستىلەنۋشى ءوزىنىڭ جوعارى جاعىنداعى كامەراعا سكوتچ جابىستىرۋعا تالپىنعان. ەندى ادامنىڭ فانتازياسى دەگەن ءار قيلى عوي. سوندىقتان اركىم شاماسى كەلگەنشە دايىندالعان بولار»، — دەيدى ن.ديداربەكوۆا.
ايتا كەتۋ كەرەك، بيىل ۇلتتىق بىرىڭعاي تەستىلەۋ ماۋسىمنىڭ 30-ىنا دەيىن جالعاسادى.
"ادىرنا" ۇلتتىق پورتالى.
