الماتى قالاسىنداعى №126 مامانداندىرىلعان ليتسەيىنىڭ جانە «تاريح مەكتەبى» ونلاين دايىندىق ورتالىعىنىڭ 11 سىنىپ وقۋشىسى جانبولات سارسەنباي ناۋرىز ايىنداعى ۇبت-دا ەڭ جوعارى 140 بالل جيناعان ساناۋلى تۇلەكتىڭ ءبىرى اتاندى، دەپ حابارلايدى “ادىرنا” ۇلتتىق پورتالى.
كوپبالالى وتباسىنان شىققان جانبولات – ءۇيدىڭ ۇلكەنى. اكەسى – كولىك جۇرگىزۋشى، اناسى – اسپاز. ۇبت-داعى جەتىستىگىنىڭ ارقاسىندا ول العاش رەت الماتىدان استاناعا ۇشاقپەن ۇشىپ كەلدى. ونى ەلوردادا «تاريح مەكتەبىنىڭ» ۇجىمى كۇتىپ الىپ، ارنايى سىيلىقتارىن تابىستادى.
جانبولات بۇل ناتيجەگە ۇزدىكسىز دايىندىق پەن ساپالى ءبىلىمنىڭ ارقاسىندا جەتكەنىن ايتادى. بولاشاقتا شەت ءتىلىن وقىتاتىن پەداگوگ بولۋدى ارماندايدى. «باق شاپتى ما، الدە باپ پا؟» دەگەن سۇراققا ول: «باپ بولماسا، باق قايدان بولسىن» دەپ جاۋاپ بەردى.
ايتۋىنشا، ەڭ جوعارى بالل جيناۋ ءۇشىن ۇزدىكسىز ەڭبەك ەتۋ، ءار تاپسىرمانى ۋاقىتىندا ورىنداۋ، جىگەرلى ءارى تالاپتى بولۋ اسا ماڭىزدى.
