1 قىركۇيەكتە ەلىمىزدە 90 مىڭعا جۋىق وقۋشى ورنىنا ارنالعان جاڭا 70 مەكتەپ ەسىكتەرىن ايقارا اشتى، ونىڭ بىرقاتارى مەملەكەت باسشىسىنىڭ تاپسىرماسىمەن «جايلى مەكتەپ» ۇلتتىق جوباسى اياسىندا سالىنعان. وقۋ-اعارتۋ ءمينيسترى عاني بەيسەمباەۆ استانا قالاسىنداعى №103 مەكتەپتىڭ اشىلۋ سالتاناتىنا قاتىستى.
ۆەدومستۆو باسشىسى وقۋشىلاردى 2024-2025 وقۋ جىلىنىڭ باستالۋىمەن قۇتتىقتادى. ول مەملەكەت تاراپىنان بالالاردى ساپالى بىلىممەن، سانالى تاربيەمەن قامتۋ باعىتىندا جاسالىپ جاتقان شارالاردى اتاپ ءوتتى. 1 قىركۇيەكتە 90 مىڭعا جۋىق وقۋشى قولدانىسقا بيىلعى جىلى بەرىلگەن، ونىڭ ىشىندە «جايلى مەكتەپ» ۇلتتىق جوباسى اياسىندا سالىنعان سۋ جاڭا مەكتەپ پارتالارىنا وتىردى. ال 200 مىڭنان استام بالا كۇردەلى جوندەۋدەن ءوتىپ، قايتا جابدىقتالعان مەكتەپتەردە ءبىلىم الادى.
«بۇگىن ۇستازداردىڭ وسكەلەڭ ۇرپاققا بىلىممەن تاربيە بەرۋدەگى وراسان ەڭبەگىن اتاپ وتكىمكەلەدى. ۇلتتىڭ اعارتۋشى ۇلى تۇلعاسى احمەت بايتۇرسىنۇلى «ۇستاز - ۇلت كەلبەتى» دەپ بەكەر ايتپاسا كەرەك. سوندىقتان اعارتۋشىلىق ميسسياسىن ادال اتقارىپ جۇرگەن ۇستازداردىڭ ەڭبەگى لايىقتى تۇردە جوعارى باعالانۋى ءتيىس. بيىلعى وقۋ جىلى جوعارى جەتىستىكتەر مەن تولاعاي تابىستارعا تولى بولسىن!»، - دەدى عاني بەيسەمباەۆ ءوز قۇتتىقتاۋىندا.
بۇگىن العاشقى جايلى مەكتەپتەردىڭ اشىلۋ سالتاناتىنا سونىمەن قاتار پرەمەر-ءمينيستردىڭ ءبىرىنشى ورىنباسارى ر.سكليار، ۆيتسە-پرەمەر ت.دۇيسەنوۆا باستاعان دەنساۋلىق ساقتاۋ، مادەنيەت جانە اقپارات، عىلىم جانە جوعارى ءبىلىم، ونەركاسىپ جانە قۇرىلىس مينيسترلەرى قاتىستى.
ەستەرىڭىزگە سالا كەتەيىك، «جايلى مەكتەپ» ۇلتتىق جوباسى مەملەكەت باسشىسىنىڭ باستاماسىمەن جۇزەگە اسۋدا. ول وقۋشى ورنىنىڭ جەتىسپەۋشىلىگىن شەشۋگە جانە قالا مەن اۋىل مەكتەپتەرى اراسىنداعى الشاقتىقتى ازايتۋعا باعىتتالعان. جوبادا فۋنكتسيونالدى جانە قاۋىپسىز ءبىلىم بەرۋ ورتاسىن قۇرۋعا ەرەكشە نازار اۋدارىلادى. باستاۋىش جانە جوعارعى سىنىپ وقۋشىلارى ءۇشىن بولەك بلوكتار قاراستىرىلعان. سونداي-اق تەحنيكالىق قۇرالداردى ەنگىزۋ ارقىلى قاۋىپسىزدىك شارالارىن ارتتىرۋ، ەرەكشە ءبىلىم بەرۋدى قاجەت ەتەتىن بالالار ءۇشىن كەدەرگىسىز ورتا قالىپتاستىرۋ، مەكتەپتى زاماناۋي پاندىك كابينەتتەرمەن جابدىقتاۋ تالاپ ەتىلەدى. 2024-2025 وقۋ جىلىندا بارلىعى 217 نىساننىڭ قۇرىلىسى جۇرۋدە. ۇلتتىق جوبا اياسىندا بارلىعى 740 مىڭ وقۋشى ورنىنا ارنالعان 369 مەكتەپ سالىنادى.
جالپى قازاقستاندىق مەكتەپتەردە 3,9 ملن وقۋشى ءبىلىم الادى. بيىلعى جىلى 352 مىڭ بالاقاي العاش رەت مەكتەپ تابالدىرىعىن اتتادى، ال 11 سىنىپقا 219 مىڭ وقۋشى كوشتى.
