پروكۋرور سەكسۋالدىق زورلىق-زومبىلىق جاسادى دەپ ايىپتالعان اكتەر دەپاردەنى شارتتى تۇردە ءبىر جارىم جىل باس بوستاندىعىنان ايىرۋدى سۇرادى. ءپاريجدىڭ قىلمىستىق سوتى ءوز ۇكىمىن 13 مامىردا شىعارادى.
پروكۋرور لوران گي جەرار دەپاردەنى ءماجبۇرلى پسيحولوگيالىق ەمدەۋدەن وتۋگە، ەكى جىلعا سايلانۋ قۇقىعىنان ايرىلۋعا جانە سەكسۋالدىق سيپاتتاعى قىلمىس جاساعاندار تىزىمىنە ەنگىزۋگە تالاپ قويدى.
جەرار دەپاردە 2021 جىلى «زەلەنىە ستاۆني» ءفيلمىنىڭ ءتۇسىرىلىمى كەزىندە ەكى ايەلگە سەكسۋالدىق زورلىق-زومبىلىق كورسەتكەنى ءۇشىن سوتتالىپ جاتىر.
ونىڭ ءبىرى، 54 جاستاعى قويۋشى سۋرەتشى امەلي Mediapart باسىلىمىنا بەرگەن سۇحباتىندا دەپاردە وعان كوپتەگەن ورىنسىز سوزدەر ايتىپ، كەيىن دەنەسىن ۇستاپ، قىسىم كورسەتكەنىن ايتتى. ول بۇل ايىپتاۋدى سوتتا دا راستادى.
پروكۋرور لوران گاي، ءوز كەزەگىندە، بۇل ىستە وقيعانىڭ تىكەلەي كۋاگەرلەرى بولعان جانە امەليدىڭ نۇسقاسىن راستاعان ءۇش كۋاگەردىڭ ايعاقتارى بار ەكەنىن ايتتى.
ەكىنشى شاعىمدانۋشى، رەجيسسەردىڭ كومەكشىسى سارا (اتى وزگەرتىلدى) ءتۇسىرىلىم كەزىندە دەپاردە ونىڭ كەۋدەسى مەن بوكسەلەرىن ۇستاعانىن ايتتى.
جەرار دەپاردە بارلىق ايىپتاردى «جالعان» جانە «جالا جابۋ» دەپ اتادى. ونىڭ ادۆوكاتى جەرەمي اسسۋس ءوز قورعاۋشىسىن «قۋدالاۋدىڭ قۇربانى» دەپ، ونى اقتاۋدى سۇرادى.
ادۆوكات سوت وتىرىستارىندا ارىزدانۋشىلارعا قاتىستى دورەكى جانە قورلايتىن سوزدەر ايتقان. ول، اتاپ ايتقاندا، ولاردى «وتىرىكشىلەر» دەپ اتادى، ولاردىڭ ماقساتى باق نازارىن اۋدارۋ ەكەنىن ايتتى
ءوز كەزەگىندە، دەپاردە سوتتا امەلي مەن ونىڭ اراسىنداعى اڭگىمە تەك تۇسىنبەۋشىلىكتەن بولعانىن ايتتى. اكتەردىڭ ايتۋىنشا، قويۋشى سۋرەتشى جۇمىسىن دۇرىس ورىنداماعان.
«ىستىق بولدى، سالماعىم 150 كەلى، كوڭىل-كۇيىم ناشار بولدى. مەن ونى تايىپ كەتپەۋ ءۇشىن ونىڭ بايقاۋسىزدا جامباسىنان ۇستاپ الدىم، ونىڭ مىنەز-قۇلقى مەنى قاتتى تىتىركەندىردى»، - دەدى دەپاردە. وسىلايشا، اكتەر امەليگە سەكسۋالدىق نيەتپەن ءتيىستى دەگەن ايىپتى جوققا شىعاردى..
سونداي-اۇ، دەپاردە امەليدىڭ ونى باسىپ، اياقتارىمەن قورشاپ الدى دەگەنىن جوققا شىعاردى.
«وسىنداي قارىنمەن مەن ەشكىمدى اياقتارىمنىڭ اراسىنا سىيدىرا المايمىن، ەگەر قالاساڭىز، تاجىريبە جاسايىق»، دەدى اكتەر.
سوت وتىرىسىندا دەپاردە كەيدە «دورەكى» ەكەنىن، بىراق ءوزىن زورلاۋشى دەپ سانامايتىنىن ايتتى. سونىمەن بىرگە، دەپاردە سەكسۋالدىق زورلىق-زومبىلىق دەپ ساناۋعا بولاتىن نارسەنى «بىلمەيتىنىن» مالىمدەدى.
