Prokýror seksýaldyq zorlyq-zombylyq jasady dep aıyptalǵan akter Depardeni shartty túrde bir jarym jyl bas bostandyǵynan aıyrýdy surady. Parıjdiń qylmystyq soty óz úkimin 13 mamyrda shyǵarady.
Prokýror Loran Gı Jerar Depardeni májbúrli psıhologııalyq emdeýden ótýge, eki jylǵa saılaný quqyǵynan aırylýǵa jáne seksýaldyq sıpattaǵy qylmys jasaǵandar tizimine engizýge talap qoıdy.
Jerar Deparde 2021 jyly «Zelenye stavnı» fılminiń túsirilimi kezinde eki áıelge seksýaldyq zorlyq-zombylyq kórsetkeni úshin sottalyp jatyr.
Onyń biri, 54 jastaǵy qoıýshy sýretshi Amelı Mediapart basylymyna bergen suhbatynda Deparde oǵan kóptegen orynsyz sózder aıtyp, keıin denesin ustap, qysym kórsetkenin aıtty. Ol bul aıyptaýdy sotta da rastady.
Prokýror Loran Gaı, óz kezeginde, bul iste oqıǵanyń tikeleı kýágerleri bolǵan jáne Amelıdiń nusqasyn rastaǵan úsh kýágerdiń aıǵaqtary bar ekenin aıtty.
Ekinshi shaǵymdanýshy, rejısserdiń kómekshisi Sara (aty ózgertildi) túsirilim kezinde Deparde onyń keýdesi men bókselerin ustaǵanyn aıtty.
Jerar Deparde barlyq aıyptardy «jalǵan» jáne «jala jabý» dep atady. Onyń advokaty Jeremı Assýs óz qorǵaýshysyn «qýdalaýdyń qurbany» dep, ony aqtaýdy surady.
Advokat sot otyrystarynda aryzdanýshylarǵa qatysty dóreki jáne qorlaıtyn sózder aıtqan. Ol, atap aıtqanda, olardy «ótirikshiler» dep atady, olardyń maqsaty BAQ nazaryn aýdarý ekenin aıtty
Óz kezeginde, Deparde sotta Amelı men onyń arasyndaǵy áńgime tek túsinbeýshilikten bolǵanyn aıtty. Akterdiń aıtýynsha, qoıýshy sýretshi jumysyn durys oryndamaǵan.
«Ystyq boldy, salmaǵym 150 keli, kóńil-kúıim nashar boldy. Men ony taıyp ketpeý úshin onyń baıqaýsyzda jambasynan ustap aldym, onyń minez-qulqy meni qatty titirkendirdi», - dedi Deparde. Osylaısha, akter Amelıge seksýaldyq nıetpen tıisti degen aıypty joqqa shyǵardy..
Sondaı-au, Deparde Amelıdiń ony basyp, aıaqtarymen qorshap aldy degenin joqqa shyǵardy.
«Osyndaı qarynmen men eshkimdi aıaqtarymnyń arasyna syıdyra almaımyn, eger qalasańyz, tájirıbe jasaıyq», dedi akter.
Sot otyrysynda Deparde keıde «dóreki» ekenin, biraq ózin zorlaýshy dep sanamaıtynyn aıtty. Sonymen birge, Deparde seksýaldyq zorlyq-zombylyq dep sanaýǵa bolatyn nárseni «bilmeıtinin» málimdedi.
