ناۋرىز مەرەكەسى قارساڭىندا كازتالوۆ اۋدانىندا جاڭا مەكتەپتىڭ قۇرىلىسى باستاۋ الدى. جاڭا مەكتەپ قونىس ەلدى مەكەنىنىڭ تۇرعىندارىن قۋانتپاق. قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆتىڭ اپاتتى مەكتەپتەردىڭ ورنىنا جاڭا مەكتەپتەر سالۋ تاپسىرماسىنا وراي، باتىس قازاقستان وبلىسى اكىمدىگىنىڭ جوسپارىنا سايكەس 60 ورىندىق مەكتەپ - «قاراشىعاناق پەتروليۋم وپەرەيتينگ ب.ۆ.» كومپانياسىنىڭ الەۋمەتتىك جاۋاپكەرشىلىگى جوباسى نەگىزىندە سالىنۋدا.
21 ناۋرىز كۇنى اۋدان اكىمى اسلانبەك سارقۇلوۆ قۇرىلىس الاڭىنا بارىپ، «قاراشىعاناق پەتروليۋم وپەرەيتينگ ب.ۆ.» كومپانياسىنىڭ الەۋمەتتىك جوبالار جانە قۇرىلىس ءبولىمىنىڭ باسشىسى ەرجان اۋباكىروۆ جانە مەردىگەر «Smartech» جشس-ءنىڭ ديرەكتورى جانىبەك بايحاتوۆپەن كەزدەستى. كەزدەسۋگە اۋدان اكىمىنىڭ ورىنباسارلارى ايدار مەنەەۆ، سەرىك قايىرليەۆ، كازتالوۆ اۋىلدىق وكرۋگىنىڭ اكىمى ەرنار عالىموۆ قاتىستى. اۋدان اكىمى اسلانبەك احمەتوللاۇلى مەكتەپتىڭ ساپاسىنا جانە قۇرىلىستىڭ مەرزىمگە ساي جۇرۋىنە اسا ءمان بەرۋ قاجەتتىگىن باسا ايتتى.
- قونىستا جاڭا مەكتەپ سالۋ ماسەلەسى بىرنەشە جىلدان بەرى كوتەرىلىپ كەلەدى. حالىق جاڭا ءبىلىم ورداسىن اسىعا كۇتۋدە. اۋدانىمىزدا بىرنەشە مەكتەپتىڭ قۇرىلىسى جاۋاپسىز مەردىگەرلەردىڭ كەسىرىنەن باياۋ جۇرگىزىلگەنى ءمالىم. سوندىقتان الدىمەن مەكتەپتىڭ ساپاسىنا، سودان سوڭ قۇرىلىس قارقىنىن ارتتىرۋعا ءمان بەرىڭىزدەر. مەكتەپتى بەلگىلەنگەن ۋاقىتتا پايدالانۋعا بەرۋىمىز قاجەت، - دەدى اۋدان اكىمى.
اۋماعى 1709,5 شارشى مەتردى قۇرايتىن جاڭا مەكتەپتىڭ قۇرىلىس جۇمىستارى 1 قىركۇيەككە دەيىن اياقتالادى دەپ جوسپارلانىپ وتىر.
«Smartech» جشس-ءنىڭ ديرەكتورى جانىبەك بايحاتوۆ:
- «Smartech» جشس كازتالوۆ اۋدانى، قونىس اۋىلىنا 60 ورىندىق مەكتەپ سالۋعا مەردىگەر بولىپ جاتىرمىز. جۇمىستى باستاپ كەتتىك. مەرزىم ۇزاقتىعى – 6 اي. 1 قىركۇيەككە دەيىن بۇل جۇمىستاردى تاپسىرامىز. قازىرگى تاڭدا وبەكت باسىندا 25 ادام كۇشى، 6 تەحنيكا كۇشى جۇمىلدىرىلعان. جۇمىستار كەستەگە سايكەس جۇرگىزىلۋدە.
قونىس جوببم-ءنىڭ ديرەكتورى ءوبيلا اياپ:
- بۇل مەكتەپ 1976 جىلى پايدالانۋعا بەرىلدى. قازىرگى كەزدە 49 جىل بولدى. مەكتەبىمىز 2021 جىلى اپاتتى دەپ تانىلعان بولاتىن. قازىر تولىق كونتينگەنتىمىز ورىندالىپ تۇر. جالپى ەندى شاعىن قۇرامدى ورتا مەكتەپتەردە 81 وقۋشى بولاتىن بولسا، بىزدە 92 وقۋشىمىز بار. جاڭا مەكتەپتىڭ قۇرىلىسى باستالدى. بۇل ءبىزدىڭ كوپتەن كۇتكەن قۋانىشىمىز. اۋىل بولىپ قۋانىپ وتىرمىز. اۋىلىمىز كوركەيىپ، ودان ءارى دامي بەرەدى دەپ ويلايمىز. بىلتىرعى جىلى اۋىلىمىزدا 12 جاڭا ءۇي بوي كوتەردى. اۋىلعا 7 وتباسى كوشىپ كەلىپ جاتىر. 64 ادام قوسىلدى اۋىلىمىزعا. ونىڭ ىشىندە 11-ءى مەكتەپ جاسىنداعى بالالار. وسى اۋىلداعى سالىنىپ جاتقان مەكتەپ قۇرىلىسى ءۇشىن پرەزيدەنتىمىزگە، وبىلىس جانە اۋدان باسشىلارىنا العىسىمىز شەكسىز. جاڭا وقۋ جىلىن جاڭا مەكتەپتە باستايمىز دەگەن ويدامىز.
قونىس جوببم-ءنىڭ 9 سىنىپ وقۋشىسى رەگينا ەرنازاروۆا:
وسى اۋىلىمىزعا جاڭادان مەكتەپ سالىنىپ جاتقانىنا بارلىعىمىز قۋانىشتىمىز. كازتالوۆ مەكتەپ-ليتسەيىنە بارعان كەزدە مەكتەپتەرىنە قىزىعاتىنبىز. وسىنداي جاعداي ءوز مەكتەبىمىزدە بولاتىنىنا قۋانامىز. اۋىلىمىز كىشكەنتاي بولعانىمەن، جايمەن كوركەيىپ جاتقانىنا قۋانىشتىمىز جانە دە الداعى ۋاقىتتا ءوزىمىزدىڭ ۇلەسىمىزدى قوسامىز دەگەن ويدامىن.
