الماتى وبلىسىنىڭ اكىمى مارات سۇلتانعازيەۆ ورتالىق كوممۋنيكاتسيالار قىزمەتىندەگى بريفينگتە وڭىردەگى قۇرىلىس سالاسىنىڭ ءوسۋ قارقىنى مەن تۇرعىن ءۇي باعدارلامالارى تۋرالى مالىمەت بەردى. ونىڭ ايتۋىنشا، قۇرىلىس سەكتورى تۇراقتى ءوسىم كورسەتىپ وتىر.
2025 جىلدىڭ 10 ايىندا وبلىستاعى قۇرىلىس كولەمى 21% ءوسىپ، 948 مىڭ شارشى مەتر تۇرعىن ءۇي پايدالانۋعا بەرىلگەن.
اكىم الەۋمەتتىك وسال توپتاردى باسپانامەن قامتۋعا ەرەكشە نازار اۋدارىلعانىن ايتتى. 2024 جىلى 1 281 وتباسى باسپانامەن قامتىلسا، بيىل 2 236 الەۋمەتتىك وسال توپتاعى وتباسىنا ءۇي بەرىلەدى.
كەيىنگى 30 جىلدا مەملەكەت تاراپىنان ەشقانداي ءۇي سالىنباعان شالعاي اۋدانداردا، ونىڭ ىشىندە نارىنقول، قاينار، كەگەن، ۇلكەن اقسۋ، باقاناس اۋىلدارىندا مەملەكەتتىك باعدارلاما اياسىندا جاڭا ۇيلەر سالىنىپ، ساتىپ الىنىپ جاتىر (شالعاي اۋدانداردا 350 مىڭ تەڭگە).
مەملەكەتتىك قىزمەتكەرلەردى، بيۋدجەتتىك ۇيىمدار مەن سپورت سالاسى وكىلدەرىنە ارنالعان «الاتاۋ» وڭىرلىك يپوتەكالىق باعدارلاماسىنا 3,1 ملرد تەڭگە قاراستىرىلىپ، 120-دان استام ازامات باسپانامەن قامتاماسىز ەتىلەدى.
