استانا قالاسىندا قاتتى جەل سالدارىنان قۇرىلىس الاڭىنداعى مۇنارالىق كران قۇلاپ، ءبىر جۇمىسشى مەرت بولدى، دەپ حابارلايدى "ادىرنا" ۇلتتىق پورتالى.
وقىس وقيعا 18 شىلدە كۇنى ساعات 20:07 شاماسىندا تۇرار رىسقۇلوۆ كوشەسى، 18/5 مەكەنجايىندا ورنالاسقان «ابىروي» تۇرعىن ءۇي كەشەنىنىڭ اۋماعىندا تىركەلدى.
وقيعا ءساتى بەينەجازبا ارقىلى الەۋمەتتىك جەلىدە تاراپ، جۇرتشىلىقتىڭ نازارىن اۋدارتتى. قاتتى جەلدىڭ سالدارىنان قۇرىلىس تەحنيكاسى اۋدارىلىپ، سالدارىنان ءبىر ادام ءتىل تارتپاي كەتتى.
قايعىلى جاعدايعا قاتىستى تۇسىنىكتەمە بەرگەن BI Group قۇرىلىس كومپانياسىنىڭ مالىمەتىنشە، كران تەحنيكالىق جاعىنان دۇرىس كۇيدە بولعان جانە جۇمىس باستالعانعا دەيىن قاجەتتى تەكسەرۋدەن وتكەن.
«وقيعا بولعان ساتتە كران وپەراتورى جۇمىسىن اياقتاپ جاتقان. وكىنىشكە قاراي، كراننىڭ قۇلاۋى سالدارىنان مەردىگەر ۇيىمنىڭ ءبىر قىزمەتكەرى قازا تاپتى. قازا بولعان ادامنىڭ تۋىستارى مەن جاقىندارىنا قايعىرىپ كوڭىل ايتامىز»، — دەلىنگەن كومپانيا تاراتقان حابارلامادا.
كومپانيا قازا بولعان ادامنىڭ وتباسىنا جان-جاقتى كومەك كورسەتىلەتىنىن جانە ءتيىستى ورگاندارمەن بىرلەسىپ، تەرگەۋ ناتيجەلەرى بويىنشا بارلىق شارالار قابىلداناتىنىن مالىمدەدى.
ايتا كەتەيىك، توتەنشە جاعداي قىزمەتىنىڭ داۋىلدى ەسكەرتۋى وقيعا تىركەلگەننەن كەيىن عانا كەلىپ تۇسكەن. قازىرگى تاڭدا وقيعا ورنىندا ءتيىستى ماماندار جۇمىس ىستەپ جاتىر.
