بوستاندىق ءمۇسىنى اقش-تا قالادى. بۇل تۋرالى 17 ناۋرىزدا اق ءۇيدىڭ ءباسپاسوز حاتشىسى كەرولاين لەۆيتت ەۋروپارلامەنت مۇشەسى رافاەل گليۋكسماننىڭ ەسكەرتكىشتى فرانتسياعا قايتارۋ تۋرالى تالابىنا جاۋاپ بەرە وتىرىپ ايتتى، دەپ حابارلايدى “ادىرنا”.
«بۇگىنگى تاڭدا فرانتسۋزداردىڭ نەمىس ءتىلىن بىلمەيتىنى امەريكا قۇراما شتاتتارىنىڭ ارقاسىندا»، - دەپ اتاپ ءوتتى اقش پرەزيدەنتىنىڭ وكىلى.
AFP حابارلاعانداي، مۇنداي تۇسىنىكتەمەمەن لەۆيتت ەكىنشى دۇنيەجۇزىلىك سوعىس كەزىندە فرانتسيانى ناتسيستىك باسقىنشىلىقتان ازات ەتۋدەگى اقش-تىڭ ءرولىن ەسكە تۇسىرگىسى كەلدى. رافاەل گليۋكسماندى اق ءۇيدىڭ ءباسپاسوز حاتشىسى "ەشكىمگە تانىس ەمەس، تومەن دارەجەلى فرانتسۋز ساياساتكەرى" دەپ اتادى.
16 ناۋرىزدا ەۋروپارلامەنت دەپۋتاتى گليۋكسمان اقش اكىمشىلىگى مەن پرەزيدەنت دونالد ترامپتىڭ شەشىمدەرى ەركىندىك قۇندىلىقتارىنا جاقىن ەمەستىگىن ايتىپ، بوستاندىق ءمۇسىنىن فرانتسياعا قايتارۋ كەرەگىن مالىمدەگەن.
ء"بىز ونى سىزدەرگە سىيلادىق، بىراق كورىپ تۇرعانىمىزداي، سىزدەر ونى مەنسىنبەيسىزدەر", - دەگەن ول امەريكالىقتارعا ارناپ.
ۋكرايناعا بەلسەنە قولداۋ كورسەتەتىن گليۋكسمان ۆاشينگتوندى ماسكەۋمەن جاقىنداسقانى ءۇشىن ايىپتادى. ونىڭ ايتۋىنشا، اقش "قياناتشىلاردىڭ جاعىندا تۇردى". سونىمەن قاتار فرانتسۋز ساياساتكەرى ترامپ اكىمشىلىگىن عىلىمي ەركىندىككە قاتاڭ تالاپ قويعان عالىمداردى جۇمىستان شىعارعانى ءۇشىن سىنعا الدى.
بوستاندىق ءمۇسىنى - فرانتسيادا ءمۇسىنشى وگيۋست ءبارتولديدىڭ جەتەكشىلىگىمەن جاسالدى. ول اقش-قا فرانتسيانىڭ تاۋەلسىزدىك سوعىسىنداعى قولداۋىن قۇرمەتتەۋ ءۇشىن سىي رەتىندە ۇسىنىلعان. 46 مەترلىك مىس ءمۇسىن 1886 جىلى نيۋ-يوركتەگى ليبەرتي ارالىندا اشىلعان. AFP مالىمەتىنشە، ءبىر كەزدەرى ءمۇسىن اقش-قا كىرەبەرىس رۇقساتىن كۇتىپ تۇرعان يمميگرانتتار ءۇشىن جاقسى ومىرگە ءۇمىتتىڭ سيمۆولى بولدى.
