ارمەنيانىڭ قاۋىپسىزدىك كەڭەسىنىڭ حاتشىسى الەن سيمونيان تۇركيامەن قارىم-قاتىناستى قالىپقا كەلتىرۋ ماسەلەسىنە قاتىستى پىكىر ءبىلدىرىپ، ەكى ەل اراسىندا قاقتىعىس تۋىنداۋىنا جول بەرمەۋ قاجەت ەكەنىن ايتتى، دەپ حابارلايدى "ادىرنا".
ونىڭ سوزىنشە، ارمەنيا بولاشاق ۇرپاققا كەك ەمەس، بەيبىتشىلىك مۇراسىن قالدىرۋى كەرەك.
سيمونياننىڭ پىكىرىنشە، ارمەنيا مەن تۇركيانىڭ سوعىسۋىنا ەشقانداي نەگىز جوق. ول ەلدە 70 جىل بويى قالىپتاسقان «رەسەيگە ارقا سۇيەمەسەك، تۇركيا ءبىزدى باسىپ الادى» دەگەن تۇسىنىك شىندىققا جاناسپايتىنىن ايتتى.
«نەلىكتەن ءبىز تۇرىكتەرمەن سوعىسۋىمىز كەرەك؟ ەگەر ولار بىزگە شابۋىل جاساۋدى شەشسە، ءبىز قورعانىسىمىزدى كۇشەيتىپ ۇلگەرمەيمىز. بىزگە 70 جىل بويى رەسەيگە سۇيەنۋ كەرەك، ايتپەسە تۇرىكتەر ءبىزدى جويىپ جىبەرەدى دەگەن جاڭساق تۇسىنىك قالىپتاستىرىلدى. الايدا ونىڭ شىندىققا ەش قاتىسى جوق»، – دەدى ول.
سونىمەن قاتار الەن سيمونيان ەلدىڭ قورعانىس قابىلەتىن قامتاماسىز ەتۋ ءۇشىن قۋاتتى ارميا قاجەت ەكەنىن اتاپ ءوتتى. ونىڭ ايتۋىنشا، سوعىستىڭ الدىن الۋ جانە كەلەر ۇرپاققا بەيبىت ءومىر قالدىرۋ – ارمەنيا قاۋىپسىزدىگىنىڭ ماڭىزدى كەپىلدىكتەرىنىڭ ءبىرى.
قاۋىپسىزدىك كەڭەسىنىڭ حاتشىسى «ترامپ باعىتى» (TRIPP) جوباسىنا دا توقتالدى. ول ساۋدا بايلانىستارى مەن ورتاق ەكونوميكالىق مۇددەلەر قالىپتاستىرۋ بەيبىتشىلىكتى نىعايتۋعا ىقپال ەتەتىنىن ايتتى. سيمونيان جوبانىڭ ەكونوميكالىق، ديپلوماتيالىق جانە قاۋىپسىزدىك تۇرعىسىنان ماڭىزى بار ەكەنىن جەتكىزدى.
سونداي-اق ونىڭ مالىمەتىنشە، مارشرۋت يران شەكاراسىنان شامامەن 15 مەتر قاشىقتىقتا وتەدى. سوندىقتان جوبانىڭ ءرولىن اقش، يران جانە تۇتاس ءوڭىردىڭ مۇددەلەرى تۇرعىسىنان قاراستىرۋ قاجەت.
«بۇل – ەكونوميكالىق ءارى ديپلوماتيالىق جوبا، بەيبىتشىلىك قۇرالى»، – دەدى الەن سيمونيان.
