اقش دەلەگاتسياسىن باستاپ كەلگەن دجەيسون سميت استاناعا ساپارى بارىسىندا قازاقستان پرەزيدەنتى قاسىم-جومارت توقاەۆقا قابىلداعانى ءۇشىن العىس ايتتى، دەپ حابارلايدى “ادىرنا”.
ول اقش پرەزيدەنتى دونالد ترامپتىڭ جىلى لەبىزىن جەتكىزدى.
دجەيسون ءسميتتىڭ ايتۋىنشا، دونالد ترامپ وعان كەزدەسۋگە بىرنەشە ساعات قالعاندا تەلەفون شالىپ، قازاقستان پرەزيدەنتىنە ءوز سالەمىن جولداۋدى تاپسىرعان.
«پرەزيدەنت سىزگە ەڭ جىلى تىلەگىن جەتكىزۋدى سۇرادى. ول سىزدەردىڭ ارالارىڭىزدا قالىپتاسقان سەنىمدى ءارى سىندارلى قارىم-قاتىناستى جوعارى باعالايتىنىن ايتتى»، – دەدى كونگرەسسمەن.
سونداي-اق دونالد ترامپ قاسىم-جومارت توقاەۆتى ماياميدە وتەتىن G20 سامميتىنە قاتىسۋ ءۇشىن كۇتەتىنىن جەتكىزگەن.
دجەيسون سميت اقش دەلەگاتسياسىنىڭ قازاقستانعا ساپارىنىڭ نەگىزگى ماقساتتارىنىڭ ءبىرى ەكى ەل اراسىنداعى ەكونوميكالىق بايلانىستاردى ودان ءارى كەڭەيتۋ مۇمكىندىكتەرىن زەردەلەۋ ەكەنىن اتاپ ءوتتى.
ء«بىز ەكىجاقتى ىنتىماقتاستىقتى نىعايتۋعا باعىتتالعان مازمۇندى ديالوگ ورناتۋعا بەرىك نيەتتىمىز. پرەزيدەنتىمىز مۇنى اسا ماڭىزدى دەپ سانايدى»، – دەدى ول.
كەزدەسۋ سوڭىندا قاسىم-جومارت توقاەۆ ءوزىنىڭ ماياميگە الداعى ساپارى قازاقستان مەن اقش اراسىنداعى كەڭەيتىلگەن ستراتەگيالىق سەرىكتەستىكتىڭ دامۋىنا جاڭا سەرپىن بەرەتىنىنە سەنىم ءبىلدىردى.
