9 ساۋىردە، استانا ۋاقىتىمەن تاڭعى 9:00-دەن باستاپ اقش قىتايدان كەلەتىن تاۋارلارعا يمپورتتىق باج سالىعىن 104 پايىزعا دەيىن كوتەرەدى، دەپ حابارلايدى "ادىرنا" ۇلتتىق پورتالى DW اگەنتتىگىنە سىلتەمە جاساپ.
اق ءۇيدىڭ ءباسپاسوز حاتشىسى كەرولاين ءليۆيتتىڭ ايتۋىنشا، جاڭا باج سالىعى قىتاي تاراپى ءوز تاراپىنان ەنگىزگەن جاۋاپتىق شارالاردى الىپ تاستاماعاندىقتان ەنگىزىلگەن.
«امەريكا شابۋىلعا ۇشىراعاندا، ول ءاردايىم ودان دا قاتتى جاۋاپ بەرەدى. قىتاي تاراپىنان جاۋاپ قايتارۋ — ۇلكەن قاتەلىك»، — دەدى ليۆيتت.
ونىڭ سوزىنشە، دونالد ترامپ قىتاي حالىق رەسپۋبليكاسىنىڭ تاريفتەر بويىنشا كەلىسىمگە كەلگىسى كەلەتىنىن بىلەدى، بىراق ولار مۇنى قالاي ىستەۋ كەرەكتىگىن تۇسىنبەيدى. ەگەر بەيجىڭ كەلىسسوزدەرگە ورالاتىن بولسا، ترامپتىڭ ۇستانىمى وزگەرەدى دەپ سەندىردى.
بۇعان دەيىن، ترامپ قىتاي ەنگىزگەن 34 پايىزدىق باج سالىعىن 8 ساۋىرگە دەيىن الىپ تاستاماسا، اقش 9 ساۋىردە قىتاي يمپورتىنا 50 پايىزدىق جاڭا سالىق ەنگىزەتىنىن ەسكەرتكەن بولاتىن. بۇل سالىقتار بۇعان دەيىن قولدانىستا بولعان 20 پايىزدىق باج سالىعىنا جانە بىرنەشە كۇن بۇرىن جاريالانعان 34 پايىزدىق ارنايى سالىققا قوسىلادى. وسىلايشا، بارلىعى 104 پايىزدىق باج سالىعى كۇشىنە ەنەدى.
8 ءساۋىر كۇنى قىتايدىڭ ساۋدا مينيسترلىگى ترامپتىڭ بۇل شەشىمىن قاتەلىك ۇستىنە قاتەلىك دەپ باعالاپ، اقش-تىڭ ارەكەتىنە جاۋاپ بەرەتىنىن مالىمدەدى.
«ءبىز ءوز قۇقىعىمىز بەن مۇددەمىزدى قورعاۋ ءۇشىن شەشىمدى جاۋاپ قايتارامىز. اقش ەنگىزىپ وتىرعان بۇل جاھاندىق تاريفتەر — حالىقارالىق ساۋدا ەرەجەلەرىنە قايشى، سۋبەكتيۆتى جانە بىرجاقتى باعالاۋعا نەگىزدەلگەن. بۇل – كلاسسيكالىق قورقىتۋ ساياساتىنىڭ كورىنىسى»، — دەلىنگەن مينيسترلىك تاراتقان مالىمدەمەدە.
قىتاي تاراپى اقش-تىڭ تالاپتارىنا ەشقاشان كونە قويمايتىنىن ايتىپ، ەگەر اقش ءوز ۇستانىمىنان قايتپاسا، قىتاي سوڭىنا دەيىن كۇرەسەتىنىن ءمالىم ەتتى. بۇل تۋرالى سينحۋا اگەنتتىگى قىتاي ساۋدا مينيسترلىگىنىڭ وكىلىنە سىلتەمە جاساپ حابارلادى.
ترامپتىڭ بۇل شەشىمى الەم بويىنشا ساياسي تۇلعالار مەن ەكونوميستەر تاراپىنان قاتاڭ سىنعا ۇشىرادى. قور نارىعىنداعى يندەكستەر كۇرت تومەندەدى، مۇناي باعاسى دا ايتارلىقتاي قۇلدىرادى. ساراپشىلاردىڭ بولجامىنشا، بۇل جاعداي دۇنيەجۇزىلىك تۇتىنۋ باعالارىنىڭ وسۋىنە جانە ەكونوميكالىق ءوسىمنىڭ باياۋلاۋىنا الىپ كەلۋى مۇمكىن.
