يسلامابادتا اقش پەن يران اراسىنداعى كەلىسسوزدەر قارساڭىندا ديپلوماتيالىق احۋال ءبىرشاما جۇمسارعانى بايقالادى.
اقش قاتارداعى جانە باسقا دا شەتەلدىك بانكتەردە بۇعاتتالعان يراندىق اكتيۆتەردى بوساتۋعا دايىن ەكەنى جونىندە بەلگى بەرگەن. Reuters اگەنتتىگىنىڭ مالىمەتىنشە، بۇل اقپاراتتى جوعارى لاۋازىمدى يراندىق دەرەككوز راستاعان.
تەگەران بۇل قادامدى ۆاشينگتوننىڭ الداعى كەلىسسوزدەرگە بايىپپەن قارايتىنىنىڭ بەلگىسى رەتىندە باعالاپ وتىر. كەلىسسوزدەر يسلاماباد قالاسىندا ءوتىپ، نەگىزگى تاقىرىپتاردىڭ ءبىرى ورمۋز بۇعازى ارقىلى قاۋىپسىز ناۆيگاتسيانى قامتاماسىز ەتۋ ماسەلەسى بولماق.
دەگەنمەن، اقش تاراپىنان اكتيۆتەردى بوساتۋ تۋرالى رەسمي مالىمدەمە جاسالعان جوق. ەكىنشى يراندىق دەرەككوزدىڭ ايتۋىنشا، ءسوز بولىپ وتىرعان قاراجات كولەمى شامامەن 6 ميلليارد دوللاردى قۇرايدى. بۇل قاراجات 2023 جىلى دوحا قالاسىنىڭ دەلدالدىعىمەن جۇزەگە اسقان تۇتقىندار الماسۋ كەلىسىمى اياسىندا قاتار بانكتەرىنە اۋدارىلعان.
اتالعان قارجى باستاپقىدا يراننىڭ وڭتۇستىك كورەيا ەلىنە مۇناي ساتۋدان تۇسكەن. الايدا 2018 جىلى دونالد ترامپ اكىمشىلىگى سانكتسيالاردى قايتا ەنگىزگەننەن كەيىن بۇعاتتالعان بولاتىن. كەيىنىرەك، 2023 جىلى اقش بۇل قاراجاتتى تەك گۋمانيتارلىق ماقساتتارعا — ازىق-تۇلىك، ءدارى-دارمەك جانە مەديتسينالىق قۇرال-جابدىقتار ساتىپ الۋعا پايدالانۋعا ءىشىنارا رۇقسات بەرگەن.
بىراق 2023 جىلعى 7 قازانداعى حاماس ۇيىمىنىڭ يزرايلگە جاساعان شابۋىلىنان كەيىن ۆاشينگتون بۇل قاراجاتقا قولجەتىمدىلىكتى قايتا شەكتەدى.
سوڭعى كۇندەرى يراننىڭ IRGC قۇرىلىمىمەن بايلانىستى اقپارات كوزدەرى اقش اكتيۆتەردى بوساتۋعا رۇقسات بەردى دەپ حابارلاعانىمەن، امەريكالىق شەنەۋنىكتەر بۇل مالىمەتتى جوققا شىعاردى. CBS News تەلەارناسىنا بەرگەن تۇسىنىكتەمەدە اقش مۇنداي شەشىم قابىلداماعانىن مالىمدەدى.
ايتا كەتەيىك، ايماقتاعى شيەلەنىستى ديپلوماتيالىق جولمەن شەشۋگە باعىتتالعان ارەكەتتەر جالعاسۋدا. دونالد ترامپ يرانعا قارسى سوققىلاردى ۋاقىتشا توقتاتۋعا دايىن ەكەنىن بىلدىرگەننەن كەيىن، رەسمي تەگەران ەكى اپتالىق ءبىتىم شارتتارىن قابىلداعان. وسىعان بايلانىستى تاراپتار اراسىندا اتىستى توقتاتۋ جونىندەگى كەلىسسوزدەر يسلامابادتا وتپەك.
