اباي وبلىسىنىڭ اكىمى بەرىك ءۋالي جاڭا مەكتەپتەردىڭ ينفراقۇرىلىمىن ءتيىستى دەڭگەيدە قامتاماسىز ەتپەگەنى ءۇشىن وبلىس اكىمىنىڭ ورىنباسارى، سەمەي قالاسىنىڭ اكىمى، بەسقاراعاي اۋدانىنىڭ اكىمى جانە ەنەرگەتيكا مەن تكش باسقارماسىنىڭ باسشىسىن تارتىپتىك جاۋاپكەرشىلىككە تارتۋدى تاپسىردى، دەپ حابارلايدى "ادىرنا" ۇلتتىق پورتالى.
بۇل تۋرالى وڭىرلىك اكىمدىكتە وتكەن كەڭەيتىلگەن اپپاراتتىق جيىندا بەلگىلى بولدى.
ءوڭىر باسشىسى مەكتەپتەر، بالاباقشالار، اۋرۋحانالار سالۋ جانە مادەنيەت پەن دەنساۋلىق ساقتاۋ نىساندارىن جاڭعىرتۋ قاجەتتىگىن ايتتى. بيىل 6 مەكتەپ، 9 بالاباقشا، 3 اۋرۋحانا جانە 2 ەمحانا سالۋ جوسپارلانعان. سونىمەن قاتار، ءبىلىم بەرۋ جانە مەديتسينا مەكەمەلەرىندە كۇردەلى جوندەۋ جۇرگىزىلەدى.
«پرەزيدەنت ۇكىمەتپەن بىرلەسىپ، وبلىستىڭ جەدەل دامۋىن جانە باستى ماسەلەلەردى كەزەڭ-كەزەڭىمەن شەشۋ جولدارىن قاراستىرۋدى تاپسىردى. بۇل – ءبىز ءۇشىن ۇلكەن جاۋاپكەرشىلىك. مەملەكەت باسشىسىنىڭ جاڭا كوپبەيىندى كلينيكالىق اۋرۋحانا قۇرىلىسىن بيىل باستاۋدى تاپسىرۋى، سونداي-اق سەمەيدەگى وقۋشىلار سارايىنىڭ قۇرىلىسىن اياقتاۋ ءۇشىن قوسىمشا 8,6 ميلليارد تەڭگە ءبولۋى – ءوڭىر ءۇشىن اسا ماڭىزدى»، – دەدى بەرىك ءۋالي.
ول پرەزيدەنت تاپسىرمالارىنىڭ ورىندالۋى قاتاڭ باقىلاۋدا بولاتىنىن، ال قازىرگى ينفراقۇرىلىمدىق جۇمىستاردا بىرقاتار ولقىلىقتار بار ەكەنىن اتاپ ءوتتى.
«قازىرگى تاڭدا «كومفورتتى مەكتەپ» ۇلتتىق جوباسى اياسىندا 5 مەكتەپتىڭ قۇرىلىسى ءجۇرىپ جاتىر. بىراق استاناعا جەلتوقسان ايىندا 3 مەكتەپتىڭ قۇرىلىسى اياقتالدى دەگەن اقپارات بەرىلدى. ءبىزدىڭ وبلىس ءۇشىن 5 مەكتەپ جەتكىلىكسىز. حالقى سانى ۇقساس وڭىرلەردە كەمىندە 7-9 مەكتەپ سالىنۋدا. اتا-انالار مەن وقۋشىلار مەكتەپتەردىڭ اشىلۋىن اسىعا كۇتىپ وتىر»، – دەدى اكىم.
بەرىك ءۋالي وبلىس اكىمىنىڭ ورىنباسارى دميتري گاريكوۆقا، سەمەي قالاسىنىڭ اكىمى تالعات مۇراتوۆقا، بەسقاراعاي اۋدانىنىڭ اكىمى نۇربەك قوشقارباەۆقا جانە ەنەرگەتيكا مەن تكش باسقارماسىنىڭ باسشىسى جاندوس قايىرحانوۆقا تارتىپتىك جازا قولدانۋدى تاپسىردى.
«ءبىلىم سالاسىنداعى ولقىلىقتار، مۇعالىمدەر مەن ءبىلىم قىزمەتكەرلەرىنىڭ جالاقىسىن ۋاقىتىلى تولەمەۋ، بالالاردى تاربيەلەۋ بويىنشا الدىن الۋ شارالارىنىڭ ءتيىستى دەڭگەيدە ۇيىمداستىرىلماۋى ءۇشىن ءبىلىم باسقارماسىنىڭ باسشىسى نۇرجان احمەتقاليەۆ قىزمەتىنەن بوساتىلادى»، – دەلىنگەن اكىمدىك حابارلاماسىندا.
