اباي وبلىسىندا ورمان ورتىمەن كۇرەستە قازا تاپقان ءورت سوندىرۋشىلەر مەن ورمانشىلارعا ەسكەرتكىش اشىلدى. اشىلۋ سالتاناتىنا وبلىس اكىمى نۇرلان ۇرانحاەۆ، وبلىستىق ءماسليحات توراعاسى قۋانىش سۇلەيمەنوۆ، قازا تاپقان ورمانشىلاردىڭ تۋىستارى، مەملەكەتتىك ورگانداردىڭ قىزمەتكەرلەرى جانە جەرگىلىكتى تۇرعىندار قاتىستى. شارادا باتىرلاردىڭ قۇرمەتىنە گۇل شوقتارىن قويۋ ءراسىمى دە وتكىزىلدى.
ەسكەرتكىشتىڭ اۆتورى — ءمۇسىنشى نۇربول قاليەۆ. گرانيت تۇعىرعا ورناتىلعان سەگىز مەترلىك ەسكەرتكىش ءتىلسىز جاۋعا قارسى تۇرعان «سەمەي ورمانى» رەزەرۆاتىنىڭ باتىل ورمانشىلارىنىڭ رۋحىنا تاعزىم ىسپەتتەس. قولادان جاسالعان ەسكەرتكىش قازا تاپقانداردىڭ باتىلدىعى مەن ءوز ىستەرىنە دەگەن ادالدىعىن بەينەلەيتىن رەلەفتەرمەن بەزەندىرىلگەن.
ەسكەرتكىشتىڭ اشىلۋىندا ءسوز العان ايماق باسشىسى نۇرلان ۇرانحاەۆ جەرلەستەرىمىزدىڭ ەرلىك داڭقى وشپەيتىندىگىن ەرەكشە اتاپ ءوتتى.
«قارا ورماندى قادىرلەپ، باتىلدىق پەن باتىرلىقتىڭ جارقىن ۇلگىسىن كورسەتكەندەر ۇرپاق جادىندا ماڭگى ساقتالادى. بۇل تۇعىرتاس تابيعاتتىڭ توسىن مىنەزىنە توتەپ بەرگەن ازاماتتاردىڭ اتىن ايگىلەۋ ءۇشىن ارنايى قويىلىپ وتىر. ەسىمدەرى تاريح تاقتاسىنا التىن ارىپپەن جازىلىپ، ۇرپاعى ماقتان ەتەر جەرلەستەرىمىزگە، ءبىز، قاشاندا باسىمىزدى يەمىز!»، - دەدى ايماق باسشىسى نۇرلان ۇرانحاەۆ ءوز سوزىندە.
شارادا قازا تاپقان ورمانشىلاردىڭ تۋىستارى ءسوز سويلەدى. سولاردىڭ ءبىرى اراي ءامىرحانوۆا ەسكەرتكىش باتىرلارعا قۇرمەت ەكەنىن اتاپ ءوتتى.
«اشىلعان ەسكەرتكىش بەيبىت كۇننىڭ باتىرلارىنا كورسەتىلگەن قۇرمەت دەپ ەسەپتەيمىن. مەملەكەت تاراپىنان كورسەتىلگەن قولداۋدى سول قايعىلى كۇننەن بەرى سەزىنىپ كەلەمىز. ءبىرى جارىنان، ءبىرى ۇلىنان، ءبىرى اعا-باۋىرىنان ايىرىلعان قايعىلى جاعدايدى ەل بولىپ بىرگە وتكەردىك. بۇگىن مىنە ەڭسەلى ەسكەرتكىش ورناتىلدى. العاش رەت بىزبەن كەزدەسكەندە مەملەكەت باسشىسى قاسىم-جومارت كەمەلۇلى بارلىق كومەكتى الاسىزدار دەپ ايتقان بولاتىن. پرەزيدەنتىمىزگە قولداۋ كورسەتىپ، كومەك قولىن سوزعانى ءۇشىن زور العىس بىلدىرەمىن. بارلىق كومەكتى الدىق، وعان مىڭ دا ءبىر العىس» - دەدى اراي ءامىرحانوۆا.
ەسكەرتكىش بورودۋليحا اۋدانىنداعى كامىشەنكا ورمانشىلىعىنىڭ ماڭى مەن رەسپۋبليكالىق كۇرە جولدىڭ بويىندا ورنالاسقان. بۇل باتىلدىق پەن ادالدىقتىڭ ماڭگىلىك سيمۆولىنا اينالىپ، ءوز حالقىنىڭ قاۋىپسىزدىگى مەن تابيعاتتى قورعاۋ ءۇشىن ءوزىن قۇربان ەتكەندەردى ەسكە سالادى.
