"زداچا جوق!" - سەمەيدە بەزبۇيرەك كوندۋكتور وقۋشى قىزدى قاقاعان سۋىقتا جولدان ءتۇسىرىپ كەتتى

3921
Adyrna.kz Telegram
"ادامدىق قايدا، اعالار؟" دەگەن سارىنداعى وقۋشى قىزدىڭ ساۋالى قازاق دالاسىن كەزىپ جۇرگەندەي. سەمەي قالاسى، №23 مەكتەپتىڭ 8-سىنىپ وقۋشىسىن اۆتوبۋس جۇرگىزۋشىسى مەن كوندۋكتور قاقاعان سۋىقتا جولدا قالدىردى. "ادامدىقتان بەزگەن اعالاردىڭ" ارەكەتىنە كۇللى وقىرمان نارازىلىق تانىتىپ وتىر. وقۋشى قىزدىڭ سۋىقتان ۇيالى تەلەفونى ءوشىپ، قاس قارايعاندا ءبىر ءوزى دالادا قالعان، دەپ جازدى "ادىرنا" ۇلتتىق پورتالى. 
اۆتوبۋستاعى بەزبۇيرەكتەردىڭ بايىپسىز ارەكەتى جايلى جۋرناليست ازامات قاسىم جازدى:
- بۇگىن سەمەيدە مىناداي جاعداي بولىپتى.
قالاداعى N23 مەكتەپتىڭ 8-سىنىبىندا وقيتىن قىز ساباقتان شىعىپ، N25 مارشرۋتتاعى اۆتوبۋسقا وتىرىپتى. كوندۋكتورعا مىڭ تەڭگە بەرسە، "زداچا جوق" دەپ كەلەسى ايالدامادان ءتۇسىرىپ كەتىپتى. بايعۇس بالا ەكى-ءۇش ايالداما جاياۋ ءجۇرىپ، وعان قوسا سوتكاسى ءوشىپ، ازەر دەگەندە اناسىنا زۆونداپتى. "قىزىم ابدەن توڭىپ قالىپتى. تاكسيمەن بارىپ، ۇيگە الىپ كەلدىم. ايتەۋىر، امان-ەسەن عوي دەپ ۇندەمەدىم" دەيدى قىزدىڭ اناسى، - دەپ جازدى اۆتور.
ءجۋرناليستىڭ جازۋىنشا، ار مەن ادامدىق سانادان جۇرداي ازامات ورىسشا سويلەپ، وقۋشىنىڭ قاۋىپسىزدىگىنە دە قارايلاماعان.
- اناسىنان سۇراعاندا ايتقانى: وقۋشى ساعات 5-تەر شاماسىندا پەستەليا كوشەسىنەن تاتكراي جاققا بارماق بولعان. "كوندۋكتور ورىسشا سويلەدى، ەر ادام" دەپتى قىز. وسى جاعدايعا بايلانىستى قالا اكىمى نۇربول نۇرساعاتوۆ N25 باعىتتاعى اۆتوبۋستىڭ كوندۋكتورىنا شارا قولدانسا، اۆتوبۋس پاركى باسشىلىعىنا ەسكەرتۋ جاساسا دەگەن ءوتىنىش بار. مۇنداي جاعداي بولاشاقتا قايتالانباس ءۇشىن. جاۋاپ كۇتەمىز، - دەپ جازدى جۋرناليست.
ازامات قاسىمنىڭ جانتۇرشىكتىرەر جازباسىنا سەمەي قالاسى اكىمدىگى رەسمي جاۋاپ بەردى. ولار:
- سالەمەتسىز بە! №25 مارشرۋتتاعى قوعامدىق كولىككە"اۆتوترانسسەمە" جشس قىزمەت كورسەتەدى. اكىمدىك تاراپىنان تاسىمالداۋشى كاسىپورىنعا كوندۋكتورعا قاتىستى شارالار قابىلداۋ تۋرالى حابارلاما جىبەرىلدى. قوعامدىق كولىك قىزمەتكەرىنە قاتىستى قابىلدانعان شارانى قوسىمشا حابارلايمىز.
سونداي-اق، اكىمشىلىك كودەكستىڭ 571 جانە 685-باپتارىنا سايكەس اۆتوموبيل كولىگىمەن جولاۋشىلار مەن باگاجدى تاسىمالداۋ ەرەجەلەرىن بۇزۋ بويىنشا ايىپپۇل سالۋعا پوليتسيا باسقارماسى قۇقىلى، - دەپ جاۋاپ جازدى.
"ادىرنا" ۇلتتىق پورتالى 
پىكىرلەر