Abaı oblysynyń ákimi Berik Ýálı jańa mektepterdiń ınfraqurylymyn tıisti deńgeıde qamtamasyz etpegeni úshin oblys ákiminiń orynbasary, Semeı qalasynyń ákimi, Besqaraǵaı aýdanynyń ákimi jáne energetıka men TKSh basqarmasynyń basshysyn tártiptik jaýapkershilikke tartýdy tapsyrdy, dep habarlaıdy "Adyrna" ulttyq portaly.
Bul týraly óńirlik ákimdikte ótken keńeıtilgen apparattyq jıynda belgili boldy.
Óńir basshysy mektepter, balabaqshalar, aýrýhanalar salý jáne mádenıet pen densaýlyq saqtaý nysandaryn jańǵyrtý qajettigin aıtty. Bıyl 6 mektep, 9 balabaqsha, 3 aýrýhana jáne 2 emhana salý josparlanǵan. Sonymen qatar, bilim berý jáne medıına mekemelerinde kúrdeli jóndeý júrgiziledi.
«Prezıdent Úkimetpen birlesip, oblystyń jedel damýyn jáne basty máselelerdi kezeń-kezeńimen sheshý joldaryn qarastyrýdy tapsyrdy. Bul – biz úshin úlken jaýapkershilik. Memleket basshysynyń jańa kópbeıindi klınıkalyq aýrýhana qurylysyn bıyl bastaýdy tapsyrýy, sondaı-aq Semeıdegi Oqýshylar saraıynyń qurylysyn aıaqtaý úshin qosymsha 8,6 mıllıard teńge bólýi – óńir úshin asa mańyzdy», – dedi Berik Ýálı.
Ol Prezıdent tapsyrmalarynyń oryndalýy qatań baqylaýda bolatynyn, al qazirgi ınfraqurylymdyq jumystarda birqatar olqylyqtar bar ekenin atap ótti.
«Qazirgi tańda «Komfortty mektep» ulttyq jobasy aıasynda 5 mekteptiń qurylysy júrip jatyr. Biraq Astanaǵa jeltoqsan aıynda 3 mekteptiń qurylysy aıaqtaldy degen aqparat berildi. Bizdiń oblys úshin 5 mektep jetkiliksiz. Halqy sany uqsas óńirlerde keminde 7-9 mektep salynýda. Ata-analar men oqýshylar mektepterdiń ashylýyn asyǵa kútip otyr», – dedi ákim.
Berik Ýálı oblys ákiminiń orynbasary Dmıtrıı Garıkovqa, Semeı qalasynyń ákimi Talǵat Muratovqa, Besqaraǵaı aýdanynyń ákimi Nurbek Qoshqarbaevqa jáne energetıka men TKSh basqarmasynyń basshysy Jandos Qaıyrhanovqa tártiptik jaza qoldanýdy tapsyrdy.
«Bilim salasyndaǵy olqylyqtar, muǵalimder men bilim qyzmetkerleriniń jalaqysyn ýaqytyly tólemeý, balalardy tárbıeleý boıynsha aldyn alý sharalarynyń tıisti deńgeıde uıymdastyrylmaýy úshin Bilim basqarmasynyń basshysy Nurjan Ahmetqalıev qyzmetinen bosatylady», – delingen ákimdik habarlamasynda.
