اباي وبلىسى، اقسۋات اۋدانى، تارباعاتاي تاۋىنىڭ ەلەكە سازىنان تابىلعان التىن بۇعى ءمۇسىنى ءوڭىردىڭ كادەسىيلىق برەندىنە اينالدى.
بۇل تۋرالى وبلىس اكىمى بەرىك ءۋالي ءوزىنىڭ الەۋمەتتىك جەلىدەگى پاراقشاسىندا جازدى.
ءمۇسىننىڭ بەينەسى تۇركى حالىقتارىنىڭ ميفولوگياسىندا تەرەڭ سيمۆولدىق مانگە يە. بۇعى – ەجەلگى تۇركىلەردىڭ سەنىم جۇيەسىندە انالىق باستاۋ، اسپانمەن بايلانىس، جول كورسەتۋشى جانە شىعۋ تەكتىڭ نىشانى رەتىندە قاراستىرىلعان. ول تۇركى اڭىز-ءاپسانالارىندا، رۋ تاڭبالارىندا، ءتىپتى ونەر تۋىندىلارىندا ءجيى كەزدەسەدى.
ارحەولوگيالىق مالىمەتتەرگە سۇيەنسەك، التىن ءمۇسىن VI عاسىرعا جاتادى. بۇل – تارباعاتاي باۋرايىنداعى ءوڭىردىڭ ەرتە داۋىردەن-اق وركەنيەتتىڭ وشاعى، ساياسي-مادەني ورتالىق بولعانىن دالەلدەيتىن قۇندى جادىگەر.
"وتكەنىمىزدەن سىر شەرتەتىن بۇل جادىگەر - ءوڭىردىڭ باي تاريحىنىڭ سيمۆولى. تۇركىلىك تانىمداعى ەجەلگى بۇعى بەينەسى ءالى كۇنگە دەيىن حالىق جادىندا جاقسى ساقتالعان", - دەپ جازدى بەرىك ءۋالي.
تاريحقا تولى تارباعاتاي جەرىنەن تابىلعان التىن بۇعى – ۇلتتىڭ جادى مەن رۋحاني مۇراسىن جاڭعىرتاتىن بىرەگەي سيمۆول سانالادى.
