الماتى اۋەجايىندا قىز بالانىڭ ورنىنا ءوزىن كەپىلگە الۋدى ۇسىنىپ، ارتىنشا شابۋىل جاساعاننىڭ قولىنان پىشاعىن تارتىپ العان ەر ادامنىڭ كىم ەكەنى انىقتالدى، دەپ حابارلايدى “ادىرنا” ۇلتتىق پورتالى 24KZ سايتىنا سىلتەپ.
بۇگىن، 7 ناۋرىزدا الماتى اۋەجايىندا پىشاق ۇستاعان ەر ادام قىزمەتكەردى كەپىلگە العان بولاتىن. ونىڭ ۆيدەوسى جەلىدە تارادى.
بەينەجازبادا ەر ادامنىڭ ەدەندە وتىرعان قىزدى شاشىنان ۇستاپ تۇرعانىن، ال قىز بالانىڭ ايقايلاپ جىلاپ، كومەك سۇراعانى كورۋگە بولادى.
اقپاراتقا سايكەس، قىلمىسكەردى ۇستاعان بەيبىت كۇننىڭ باتىرى – ءابدىرايىم مۇسا سايرانبايۇلى. ول 1973 جىلى تۋعان.
ول تۋىستارىن شىعارىپ سالۋعا بارعاندا وقىس وقيعانىڭ ۇستىنەن تۇسكەن. مۇسا سايرانبايۇلى ءوزىن قىز بالانىڭ ورنىنا كەپىلگە الۋدى ۇسىنعان.
ايتا كەتەيىك، پرەزيدەنت قاسىم-جومارت توقاەۆ اۋەجايدا ايەلدى قۇتقارعان ەر ادامعا ناگرادا بەرۋدى تاپسىردى.
