اقش-تىڭ مەملەكەتتىك دەپارتامەنتى 4 ناۋرىز كۇنى قىتايدان قاشىپ ءوتىپ، ول جاقتاعى از ساندى مۇسىلمان ۇلتتارى كورىپ جاتقان قىسىمدى جايىپ سالعان سايراگۇل ساۋىتبايعا «باتىل ايەلدەر» حالىقارالىق سىيلىعىن بەرگەن بولاتىن. وسى وقيعاعا بايلانىستى قىتايدىڭ قازاقستانداعى ەلشىسى چجان سياو فەيسبۋكتەگى پاراقشاسىندا بىلاي دەپ جازبا قالدىرعان:
«4 ناۋرىزدا ۆاشينگتوندا سايراگۇل ساۋىتباي مەملەكەتتىك دەپارتامەنتتىڭ رەجيسسەرلىعىمەن الدەبىر ەرلىگى ءۇشىن بەلگىسىز ءبىر سىيلىقتى الىپتى. بۇل – قىتايدىڭ ىشكى ىسىنە ارالاسۋعا باعىتتالعان كوپە-كورنەۋ ارانداتۋ. شارانىڭ ءوزى باستان اياق قىزىقسىز تسيرك بولعانىمەن، ۆاشينگتوننىڭ تۇپكى ارام ويىن اشكەرەلەپ بەردى.
شىڭجاڭداعى تەرروريزممەن جانە ەكسترەميزممەن كۇرەستە ۇلكەن جەتىستىككە جەتكەنىمىزدى كوزگە ىلمەيتىن ۆاشينگتون سوڭعى جىلدارى شىڭجاڭ ماسەلەسىن اسىرا سىلتەپ جىبەردى. ءتۇرلى جالالاردى تاراتىپ، شىڭجاڭدا تۇراقسىزدىق ورناتۋ ارقىلى قىتايدىڭ تۇبىنە جەتپەك.
الايدا ولاردىڭ ارام ويى ءاردايىم ىسكە اسپاي قالا بەرەدى. شىڭجاڭ بۇرىنعىدان دا تۇراقتى ايماققا اينالىپ، حالقى بەيبىت ءارى باقۋاتتى تۇرىپ جاتىر.
تاجىريبەمىز كورسەتكەندەي، قىتاي ويلاپ تاپقان ەكسترەميزممەن كۇرەس ءتاسىلى جەمىسىن بەردى. بۇل – قىتايدىڭ تەرروريزم جانە ەكسترەميزممەن كۇرەسكە قوسقان زور ۇلەسى.
ۆاشينگتون ءوز وتىرىگىنە ءوزى سەنىپ ءجۇر. بۇل ولاردىڭ ناداندىعىنىڭ بەلگىسى. وتىرىكتى ءجۇز رەت قايتالاساڭ دا، شىندىققا اينالمايدى. ماراپاتتاۋمەن بايلانىستى مىنا تسيرك اقش-تىڭ يدەولوگيالىق ۆيرۋستىڭ ەڭ ۇلكەن كوزى ەكەنىن كورسەتتى.
«باتىرعا» بايلانىستى ايتارىمىز، ول قىتايدا دا، قازاقستاندا دا قىلمىسكەر دەپ تانىلعان. ونىڭ ەرلىگى – وتانىن ساتۋ، ءوزىن، وتباسىن اسىراعان ەلگە قارا كۇيە جاعۋ. ەگەر ەرلىك جاساعىش بولسا، شىڭجاڭداعى نەسيەسىن جاپپاي ما؟ ول ءوزىنىڭ گەوساياسي تسيركتە قانداي ءرول اتقارىپ جۇرگەنىن تۇسىنبەيتىنى وكىنىشتى».
چجان سياو بۇل رەت قانا ەمەس، قازاق ەلىندە بولىپ جاتقان جاعدايلارعا ۇنەمى پىكىر ءبىلدىرىپ، قازاقستاندىقتاردىڭ اشش-شۋ-ىزاسىن تۋدىرۋمەن كەلەدى. ول وسىدان ەكى اپتا بۇرىن Twitter اككاۋنتىندا كوروناۆيرۋسقا قوعامنىڭ ارەكەتىنە رەنىشتى پىكىرلەرى جاريالاپ، "قىتايمەن شەكارانى جابۋ دۇرىس ەمەس" دەگەن بولاتىن.
