ءۇندىستان-وزبەكستان حالىقارالىق كولىك ءدالىزى قازاقستانعا دەيىن ۇزارتىلدى. بۇل تۋرالى «ۋزبەكيستون تەمير يۋللاري» (وزبەكستان تەمىر جولدارى) جاريالادى، دەپ حابارلايدى “ادىرنا” ۇلتتىق پورتالى.
12 جيىرما فۋتتىق كونتەينەردەن تۇراتىن العاشقى پويىز مۋندرا پورتىنان ء(ۇندىستان) سوروكوۆايا ستانتسياسىنا (قازاقستان) جونەلتىلدى. بۇل باعىت يران، تۇركىمەنستان، وزبەكستان جانە قازاقستان ارقىلى وتەدى، تەڭىز ارقىلى 1585 شاقىرىم، تەمىرجول ارقىلى 4300 شاقىرىمدى قۇرايدى.
جوبا وپەراتورى «وزتەميريۋلكونتەينەر» اق (وزبەكستاننىڭ تەمىر جول ەكسپەديتورى), «TULM» اق (تۇركمەنستاننىڭ كولىك-لوگيستيكا ورتالىعى) جانە «كەدەنترانسسەرۆيس» اق (قازاقستانداعى لوگيستيكالىق تەرمينالدار وپەراتورى) بولدى.
وسى مارشرۋت بويىنشا بۇعان دەيىن ءۇندىستان مەن وزبەكستان اراسىندا كونتەينەرلىك تاسىمالدار ءساتتى جۇزەگە اسىرىلعان بولاتىن (مۋندرا — سەرگەلي باعىتى بويىنشا). «وزتەميريۋلكونتەينەر» اق باسقارما توراعاسى ميرزيەد ميرحاميدوۆ اتاپ وتكەندەي، ەندى كومپانيا ءۇندىستان — ورتالىق ازيا مۋلتيمودالدى ءدالىزى بويىنشا كونتەينەرلىك پويىزداردى تۇراقتى تۇردە جونەلتۋدى جوسپارلاپ وتىر.
«قازاقستان تەمىر جولى» ءباسپاسوز قىزمەتى ءوز كەزەگىندە، ءۇندىستاننان قازاقستانعا كەراميكالىق پليتكا جۇكتەلگەنىن ناقتىلادى. جەتكىزۋ مەرزىمى باندار-ابباس پورتىنىڭ (يران) جۇكتەلۋىنە بايلانىستى شامامەن 25-30 كۇندى قۇرايدى.
«تاسىمالداۋ «سولتۇستىك-وڭتۇستىك» ءدالىزىنىڭ شىعىس باعىتى بويىنشا كونتەينەرلىك قاتىناستى دامىتۋ اياسىندا جۇزەگە اسىرىلادى. بۇل ءدالىز جەتكىزۋ مەرزىمىن، جۇك تاسىمالداۋ شىعىندارىن ايتارلىقتاي قىسقارتۋعا جانە ەلدەردىڭ ەكسپورتتاۋشىلار مەن يمپورتتاۋشىلاردىڭ مۇمكىندىگىن كەڭەيتەدى»، - دەپ اتاپ ءوتتى تاسىمالداۋشى.
