Úndistan-Ózbekstan halyqaralyq kólik dálizi Qazaqstanǵa deıin uzartyldy. Bul týraly «Ýzbekıston temır ıýlları» (Ózbekstan temir joldary) jarııalady, dep habarlaıdy “Adyrna” ulttyq portaly.
12 jıyrma fýttyq konteınerden turatyn alǵashqy poıyz Mýndra portynan (Úndistan) Sorokovaıa stanııasyna (Qazaqstan) jóneltildi. Bul baǵyt Iran, Túrkimenstan, Ózbekstan jáne Qazaqstan arqyly ótedi, teńiz arqyly 1585 shaqyrym, temirjol arqyly 4300 shaqyrymdy quraıdy.
Joba operatory «Óztemırıýlkonteıner» AQ (Ózbekstannyń temir jol ekspedıtory), «TULM» AQ (Túrkmenstannyń kólik-logıstıka ortalyǵy) jáne «Kedentransservıs» AQ (Qazaqstandaǵy logıstıkalyq termınaldar operatory) boldy.
Osy marshrýt boıynsha buǵan deıin Úndistan men Ózbekstan arasynda konteınerlik tasymaldar sátti júzege asyrylǵan bolatyn (Mýndra — Sergelı baǵyty boıynsha). «Óztemırıýlkonteıner» AQ basqarma tóraǵasy Mırzıed Mırhamıdov atap ótkendeı, endi kompanııa Úndistan — Ortalyq Azııa mýltımodaldy dálizi boıynsha konteınerlik poıyzdardy turaqty túrde jóneltýdi josparlap otyr.
«Qazaqstan temir joly» baspasóz qyzmeti óz kezeginde, Úndistannan Qazaqstanǵa keramıkalyq plıtka júktelgenin naqtylady. Jetkizý merzimi Bandar-Abbas portynyń (Iran) júktelýine baılanysty shamamen 25-30 kúndi quraıdy.
«Tasymaldaý «Soltústik-Ońtústik» dáliziniń shyǵys baǵyty boıynsha konteınerlik qatynasty damytý aıasynda júzege asyrylady. Bul dáliz jetkizý merzimin, júk tasymaldaý shyǵyndaryn aıtarlyqtaı qysqartýǵa jáne elderdiń eksporttaýshylar men ımporttaýshylardyń múmkindigin keńeıtedi», - dep atap ótti tasymaldaýshy.
