اقش-تىڭ باستى فەدەرالدى اگەنتتىكتەرى فبر، مەملەكەتتىك دەپارتامەنت جانە پەنتاگون، قىزمەتكەرلەرىنە يلون ماسك جىبەرگەن ەلەكتروندىق حاتقا جاۋاپ بەرمەۋدى تاپسىردى، دەپ حابارلايدى "ادىرنا" ۇلتتىق پورتالى BBC-گە سىلتەمە جاساپ.
ماسك مەملەكەتتىك قىزمەتكەرلەردەن ءوز جۇمىسىنىڭ تيىمدىلىگىنە باعا بەرۋىن تالاپ ەتكەن ەدى.
دونالد ترامپتىڭ جاڭا اكىمشىلىگىندە ماسك ۇكىمەت تيىمدىلىگى دەپارتامەنتىن (DOGE) باسقارادى. ونىڭ ايتۋىنشا، بۇل دەپارتامەنتتىڭ نەگىزگى مىندەتتەرى – بيۋدجەتتىك شىعىنداردى ازايتۋ، ارتىق بيۋروكراتيانى قىسقارتۋ جانە جەمقورلىقپەن كۇرەسۋ.
وتكەن سەنبىدە ماسك باسقاراتىن قىزمەتكەرلەردى باسقارۋ كەڭسەسى (Office of Personnel Management – OPM) ميلليونداعان مەملەكەتتىك قىزمەتكەرلەرگە ەلەكتروندىق حات جىبەرىپ، وتكەن اپتاداعى جۇمىستارى تۋرالى قىسقاشا ەسەپتى دۇيسەنبىگە دەيىن جولداۋدى تالاپ ەتتى.
ماسك ەگەر كىمدە-كىم بۇل تالاپتى ورىنداماسا نەمەسە بەلگىلەنگەن مەرزىمدى بۇزسا، ونى ء"وز ەركىمەن وتستاۆكاعا كەتۋ" دەپ سانايتىنىن مالىمدەدى.
"بۇل تالاپ زاڭسىز ءارى ويعا قونىمسىز. ماسك ۇكىمەتتىك قۇرىلىمدارعا جانە ءوز ىسىنە ادال مەملەكەتتىك قىزمەتكەرلەرگە قىسىم كورسەتۋدى جالعاستىرۋدا", – دەپ مالىمدەدى ۆيردجينيا شتاتىنىڭ دەموكرات كونگرەسسمەنى دجەرري كوننوللي.
كەيبىر اگەنتتىكتەر قىزمەتكەرلەرىنە ماسكتىڭ تالابىن ورىنداۋدى ۇسىنسا، كەيبىر ۆەدومستۆولار كەرىسىنشە جاۋاپ بەرۋدەن باس تارتتى.
جەكسەنبى كۇنى ماسك ح الەۋمەتتىك جەلىسىندە (بۇرىنعى Twitter) كوپتەگەن ەسەپتەردى العانىن جانە بىرقاتار مەملەكەتتىك قىزمەتكەرلەردى جوعارى تيىمدىلىگى ءۇشىن ماراپاتتاۋدى جوسپارلاپ وتىرعانىن جازدى.
دەگەنمەن، اقش-تىڭ نەگىزگى فەدەرالدى ۆەدومستۆولارى بۇل باستامانى قولدامادى.
جاڭادان تاعايىندالعان فبر ديرەكتورى كەش پاتەل سەنبى كۇنى كەشكە قىزمەتكەرلەرىنە OPM-ءنىڭ سۇرانىسىنا جاۋاپ بەرمەۋ تۋرالى نۇسقاۋ جىبەردى. ول فبر جۇمىسىنا كەز كەلگەن تەكسەرۋلەر تەك ديرەكتسيا ارقىلى جۇرگىزىلەتىنىن ەسكە سالدى.
وسىعان ۇقساس مالىمدەمەنى اقش مەملەكەتتىك دەپارتامەنتى دە جاسادى، ولار تەك ءوز باسشىلىعى عانا اگەنتتىكتىڭ جۇمىسىنا باعا بەرە الاتىنىن ايتتى.
اقش مەملەكەتتىك دەپارتامەنتىنىڭ جوعارى لاۋازىمدى قىزمەتكەرى تيبور ناد قىزمەتكەرلەرگە جىبەرگەن ەلەكتروندىق حاتىندا "ەشبىر قىزمەتكەر ءوز دەپارتامەنتى ىشىندەگى سۋبورديناتسيادان تىس ەسەپ بەرۋگە مىندەتتى ەمەس" دەپ مالىمدەدى.
سونىمەن قاتار، پەنتاگون، اقش ىشكى قاۋىپسىزدىك مينيسترلىگى جانە توتەنشە جاعدايلاردى باسقارۋ فەدەرالدى اگەنتتىگى (FEMA) دە ءوز قىزمەتكەرلەرىنە ماسكتىڭ سۇرانىسىنا جاۋاپ بەرمەۋدى تاپسىردى.
"قاجەت بولعان جاعدايدا عانا قورعانىس مينيسترلىگى OPM-نەن كەلگەن ەلەكتروندىق حاتقا جاۋاپ بەرۋ ءتارتىبىن ۇيلەستىرەتىن بولادى", – دەلىنگەن پەنتاگون باسشىلىعىنىڭ ءوز قىزمەتكەرلەرىنە جولداعان ۇندەۋىندە.
