قازاقستاندا رەسەيلىك زاڭدى تۇلعالار سانى جىلدان-جىلعا قىسقارىپ كەلەدى، دەپ حابارلايدى "ادىرنا" ۇلتتىق پورتالى Kommersant.ru باسىلىمىنا سىلتەمە جاساپ.
ۇلتتىق ستاتيستيكا بيۋروسىنىڭ دەرەكتەرىنە سۇيەنسەك، سوڭعى توقساندا ەلىمىزدە تىركەلگەن رەسەيلىك كومپانيالار سانى التى جىلداعى ەڭ تومەنگى كورسەتكىشكە جەتكەن. قازىرگى تاڭدا قازاقستاندا شامامەن 18 مىڭ رەسەيلىك كومپانيا جۇمىس ىستەيدى. بۇل – 2018 جىلدان بەرگى ەڭ از كورسەتكىش. ال 2024 جىلدىڭ باسىنان بەرى ولاردىڭ سانى 500-گە ازايعان.
ماماندار بۇل ءۇردىستى رەسەيگە قارسى سانكتسيالىق قىسىممەن بايلانىستىرىپ وتىر. قازاق ۇلتتىق ۋنيۆەرسيتەتىنىڭ پروفەسسورى ماعبات سپانوۆتىڭ ايتۋىنشا، جاعداي ۇرەي تۋعىزاتىنداي ەمەس.
«مەن بۇل ءۇردىستى قالىپتى قۇبىلىس دەپ ەسەپتەيمىن. سانكتسيالار مەن گەوساياسي فاكتورلار رەسەي ەكونوميكاسىنىڭ جالپى بەلسەندىلىگىن تومەندەتىپ وتىر. سونىمەن قاتار، ارنايى اسكەري وپەراتسيا باستالعان كەزدە كوپتەگەن رەسەيلىك رەلوكانتتار قازاقستانعا كوشىپ كەلىپ، ۋاقىتشا بيزنەسىن اشتى. قازىر ولاردىڭ ءبىرازى ەلگە ورالدى نەمەسە باسقا باعىتتارعا كەتتى»، – دەيدى پروفەسسور.
ونىڭ سوزىنشە، بۇل تەندەنتسياعا قاراماستان، قازاقستان مەن رەسەي اراسىنداعى ساۋدا اينالىمى ازايعان جوق، الايدا قىتاي ءبىرىنشى ورىنعا شىعىپ، سىرتقى ساۋدا كولەمى بويىنشا رەسەيدەن وزعان.
ەڭ كوپ قىسقارۋ ساۋدا سالاسىندا بايقالعان – 200-دەن استام كومپانيا جۇمىسىن توقتاتىپ، جالپى سانى 7,5 مىڭعا دەيىن ءتۇستى. IT سەكتورىندا دا 70 كومپانيا جابىلىپ، بۇل سالاداعى رەسەيلىك ۇيىمدار سانى 2,5 مىڭعا دەيىن قىسقارعان.
Transasia Logistics كومپانياسىنىڭ اتقارۋشى ديرەكتورى كيريلل لاتينسكي دە نەگىزگى سەبەپ – سانكتسيالاردىڭ كۇشەيۋى ەكەنىن ايتادى.
«2023 جىلدىڭ جەلتوقسانىندا اقش پرەزيدەنتى دجو بايدەننىڭ جارلىعى قابىلدانىپ، رەسەيلىك زاڭدى تۇلعالار ءۇشىن قارجىلىق وپەراتسيالاردى جۇرگىزۋ قيىنداي ءتۇستى. بۇل – قازاقستانداعى رەسەيلىك بيزنەسكە دە اسەر ەتتى»، – دەيدى ول.
ەسكە سالساق، بيىل ناۋرىز ايىندا اقش بۇرىنعى پرەزيدەنتى دونالد ترامپ رەسەيگە قارسى سانكتسيالاردى تاعى ءبىر جىلعا ۇزارتقان بولاتىن.
