China Unicom مەن Huawei كومپانياسى بىرلەسىپ قىتايدىڭ حەبەي پروۆينتسياسىنداعى سيۋنان جاڭا اۋدانىندا العاشقى 10G كەڭ جولاقتى جەلىنى ىسكە قوستى، دەپ حابارلايدى “ادىرنا” ۇلتتىق پورتالى ريا نوۆوستي اگەنتتىگىنە سىلتەمە جاساپ.
اگەنتتىك بۇل تۋرالى قىتايلىق MyDrivers رەسۋرسىنىڭ اقپاراتىنا سۇيەنە وتىرىپ جازعان.
"Huawei مەن China Unicom سيۋنان جاڭا اۋدانىندا العاشقى 10G كەڭ جولاقتى جەلىنى ءساتتى ىسكە قوسۋ ءۇشىن كۇش بىرىكتىردى. 10G كەڭ جولاقتى بايلانىسىن ورناتۋ الەمدەگى العاشقى 50G PON شەشىمىنە نەگىزدەلگەن", – دەلىنگەن ماتەريالدا.
جەلىنى جاڭارتۋ بارىسىندا تالشىقتى-وپتيكالىق قاتىناۋ جەلىسىنىڭ بازالىق ارحيتەكتۋراسى جەتىلدىرىلىپ، ءبىر قولدانۋشىعا ارنالعان وتكىزۋ قابىلەتى ءداستۇرلى گيگابيتتىك دەڭگەيدەن 10G دەڭگەيىنە دەيىن ارتقان. ال جەلىدەگى كىدىرىس ميلليسەكۋندتىق دەڭگەيگە دەيىن قىسقارعانى ايتىلعان.
ماتەريالدا ناقتى جۇكتەۋ جىلدامدىعى 9834 مبيت/س-قا، ال جۇكتەپ جىبەرۋ جىلدامدىعى 1008 مبيت/س-قا جەتكەنى كورسەتىلگەن. بۇل تەحنولوگيانىڭ بولاشاقتا ۇلكەن وتكىزۋ قابىلەتىن تالاپ ەتەتىن سەرۆيستەر مەن قوسىمشالاردى دامىتۋ ءۇشىن ماڭىزدى ەكەنى ەرەكشە اتاپ وتىلگەن.
Fast Technology پورتالىنىڭ دەرەكتەرىنە سۇيەنسەك، قىتايدا 5G ءموبيلدى بايلانىسىن پايدالانۋشىلار سانى 1 ميللياردتان اسقان. ەل بويىنشا 18 مىڭنان استام 5G+ جەلىلىك قۇرىلىس جوباسى جۇزەگە اسىرىلىپ جاتىر، ونىڭ ىشىندە وندىرىستىك قولدانۋعا ارنالعاندارى دا بار. ال 10G جەلىلەرىن دامىتۋ ءۇشىن 168 پيلوتتىق جوباعا قارجى بولىنگەن.
