ارمەنيا استاناسى ەرەۆاندا قازاقستاننىڭ مادەني كۇندەرى اياسىندا قازاقتىڭ ۇلى ويشىلى جانە اقىنى اباي قۇنانبايۇلى اتىنداعى ساياباقتىڭ سالتاناتتى اشىلۋى ءوتتى، دەپ حابارلايدى "ادىرنا" ۇلتتىق پورتالى.
ارمەنياعا رەسمي ساپارى بارىسىندا مەملەكەتتەر باسشىلارى اراسىندا جاسالعان كەلىسىمنىڭ ناتيجەسىندە جۇزەگە استى.
ءىس-شاراعا قازاقستاننىڭ مادەنيەت جانە اقپارات ءمينيسترى ايدا بالاەۆا، ارمەنيانىڭ ءبىلىم، عىلىم، مادەنيەت جانە سپورت ءمينيسترى جاننا اندرەاسيان، ەرەۆان مەرىنىڭ ءبىرىنشى ورىنباسارى ارمەن پامبۋحچيان جانە قازاقستاننىڭ ارمەنياداعى ەلشىسى بولات يمانباەۆ قاتىستى. سونداي-اق ەكى ەلدىڭ زيالى قاۋىم وكىلدەرى، جەرگىلىكتى تۇرعىندار مەن قوناقتار جيىنعا كۋا بولدى.
اشىلۋ سالتاناتىندا ءسوز سويلەگەن ايدا بالاەۆا ارمەنيا بيلىگىنە العىسىن ءبىلدىرىپ، بۇل وقيعانىڭ ەكى ەل اراسىنداعى مادەني بايلانىستاردى ودان ءارى تەرەڭدەتە تۇسەتىنىن اتاپ ءوتتى.
— ارمەنيا استاناسىندا قازاقتىڭ ۇلى اقىنى ءارى ويشىلى اباي قۇنانبايۇلىنا ارنالعان ساياباق اشىلىپ وتىر. بۇل — ەكى حالىق اراسىنداعى دوستىقتىڭ، ءوزارا قۇرمەت پەن رۋحاني بايلانىستىڭ ايقىن كورىنىسى، — دەدى مينيستر.
ءىس-شارا بارىسىندا قازاقستان مەن ارمەنيا مينيسترلەرى ساياباققا ەستەلىك رەتىندە اعاش وتىرعىزدى. اشىلۋ سوڭىندا ابايدىڭ "سەگىز اياق" شىعارماسىن ورىنداعان دومبىراشىلار ءانسامبلى مەن جەرگىلىكتى ونەرپازدار كونتسەرت قويىپ، قوناقتار قازاق حالقىنىڭ ۇلتتىق تاعامدارى جانە مادەنيەتىمەن تانىستى.
ساپار اياسىندا ايدا بالاەۆا باستاعان دەلەگاتسيا مەسروپ ماشتوتس اتىنداعى ماتەناداران — كونە قولجازبالار عىلىمي-زەرتتەۋ ينستيتۋتىنا بارىپ، ارميان حالقىنىڭ جازبا مۇرالارىمەن تانىستى.
ايتا كەتەيىك، ابايعا ارنالعان ەسكەرتكىشتەر مەن بيۋستتەر الەمنىڭ ونداعان ەلىندە ورناتىلعان. ال ارمەنيادا بۇگىنگى تاڭدا 100-دەن اسا قازاقستاندىق كاسىپورىن جۇمىس ىستەيدى.
